ភ្នំពេញ: កាលពីវេលាម៉ោង ៨និង ៤៥នាទីព្រឹក ថ្ងៃទី៣១ ខែធ្នូ ឆ្នាំ២០១៩ ស្ថិតនៅលើមហាវិថីឈ្នះឈ្នះ ក្នុងភូមិកប់ស្រូវតូច សង្កាត់គោករការ ខណ្ឌដូនពេញ មានករណីគ្រោះថ្នាក់ចរាចរណ៍មួយ រវាងរថយន្តពីរគ្រឿងបុកគ្នា បណ្ដាលឲ្យរងការខូចខាត។

រថយន្តបង្កម៉ាកហ៊ីយ៉ាន់ដាយ ពណ៌ទឹកប្រាក់ ពាក់ស្លាកលេខ ភ្នំពេញ 3E -1100 អ្នកបើកបរឈ្មោះ រិទ្ធ ណារ៉ូត ភេទប្រុស អាយុ ២៣ឆ្នាំ ស្នាក់នៅភូមិបឹងក្តុល ឃុំកំពង់អុស ស្រុកពញ្ញាឮ ខេត្តកណ្ដាល។

ចំណែករថយន្តរងគ្រោះ ម៉ាកកាមរី ពណ៌ព្រីងទុំ ពាក់ស្លាកលេខ ភ្នំពេញ 2N- 6394 អ្នកបើកបរឈ្មោះ ផូ ភេទប្រុស អាយុ៣៩ ឆ្នាំ ស្នាក់នៅភូមិឡឥដ្ឋ ឃុំព្រែកដំបង ស្រុកមុខកំពូល ខេត្តកណ្ដាល។

តាបប្រភពព័ត៌មាននៅកន្លែងកើតហេតុ បានឲ្យដឹងថា នៅមុនពេលកើតហេតុ រថយន្តទាំងពីរគ្រឿង បានធ្វើដំណើរតាមបណ្តោយមហាវិថីឈ្នះឈ្នះ ស្របទិសគ្នា ដោយរថយន្តកាមរី បើកខាងមុខ។ លុះមកដល់ចំណុចកើតហេតុ រថយន្តហ៊ីយ៉ាន់ដាយ បានជ្រុលទៅបុកពីក្រោយរថយន្តកាមី រុញឡើងខឿនទ្រូងផ្លូវ បណ្ដាលឲ្យដាច់កាឡេ និងរងការខូចខាតកំណាត់ក្រោយយ៉ាងដំណំ។

ក្រោយកើតហេតុ សមត្ថកិច្ចជំនាញខណ្ឌ បានចុះវាស់វែង យករថយន្តទាំងពីរគ្រឿង ទៅរក្សាទុកបណ្តោះអាសន្ននៅអធិការដ្ឋាន រង់ចាំដោះស្រាយជាក្រោយ៕