ព្រះសីហនុៈ កាលពីយប់ថ្ងៃទី៩ ខែមករា ឆ្នាំ២០២០ កម្លាំងល្បាតបានប្រទះឃើញរថយន្ដតាកូមា ១គ្រឿង បានបើកចេញតាមបណ្តោយផ្លូវអូរ២ ភូមិ៥ សង្កាត់លេខ៤ ក្រុង-ខេត្តព្រះសីហនុ។

ដោយរថយន្តខាងលើ បានយកស្បោងប្លាស្ទិក ពណ៌ខ្មៅ បិតផ្លាកលេខ ដែលគួរឲ្យសង្ស័យ ជាក្រុមជនទុច្ចរិត បម្រុងចេញធ្វើសកម្មភាពប្លន់ ឬចាប់ជំរិត។ទើបភ្លាមនោះកម្លាំងជំនាញ បានបោះដៃសហការគ្នា បើកម៉ូតូតាមឃ្លាំមើល តែត្រូវជនសង្ស័យដឹងខ្លួន ក៏បើករថយន្តបង្វែងដាន រត់គេចខ្លួនឡើងទៅផ្លូវជាតិ៤។

ដោយកម្លាំងសមត្ថកិច្ច បានសហការជាមួយកម្លាំងអធិការដ្ឋាននគរបាលស្រុកព្រៃនប់ ធ្វើការដេញតាមរហូតហួសស្ពានទឹកសាប ឃុំរាម ជនសង្ស័យ បានបត់រថយន្តចូលផ្លូវលំមួយ ដើម្បីគេចខ្លួន តែរថយន្ដបើកលឿន ក៏បានក្រឡាប់តែម្តង ពេលនោះ ជនសង្ស័យបានព្យាយាមលូនចេញពីរថយន្ត ដើម្បីរត់គេចខ្លួន តែត្រូវបានកម្លាំងសមត្ថកិច្ច ចាប់ឃាត់ខ្លួនបានម្នាក់ និងដកហូតវត្ថុតាងកាំភ្លើងខ្លី១ដើម ខណៈជនសង្ស័យ២នាក់ទៀត បានរត់គេចខ្លួន ចូលពួនក្នុងព្រៃ ហើយកម្លាំងសមត្ថកិច្ច កំពុងធ្វើការស្វែងរកបន្ត។

សូមជំរាបថា ពេលរថយន្តក្រឡាប់ នៅវេលាម៉ោង ១២ និង៣០នាទីរំលងអធ្រាត្រ ឈានចូលថ្ងៃទី១០ ខែមករា ឆ្នាំ២០២០។ ជនសង្ស័យឈ្មោះ WANGHONGTAO ភេទប្រុស អាយុ២៩ឆ្នាំ ជនជាតិចិន មុខរបរអ្នកនាំភ្ញៀវលេងល្បែង ស្នាក់នៅភូមិ១ សង្កាត់លេខ៣ ក្រុង-ខេត្តព្រះសីហនុ។

វត្ថុតាងដកហូតបាន៖ កាំភ្លើងខ្លី១ដើម ម៉ាកZORAKI ពណ៌ខ្មៅ លេខ000232 បង់១មាន៥គ្រាប់ និងរថយន្តម៉ាក TAKOMA ពណ៌ទឹកប៉ិច ផ្លាកលេខ ភ្នំពេញ2BD-7915។

ករណីនេះ កម្លាំងជំនាញការិយាល័យនគរបាលព្រហ្មទណ្ឌកម្រិតស្រាល កំពុងបន្តនីតិវិធី៕