ភ្នំពេញ: ជនសង្ស័យម្នាក់ ត្រូវបានប៉ុស្តិ៍នគរបាលរដ្ឋបាលអូរឡាំពិក ធ្វើការឃាត់ខ្លួនជាក់ស្ដែង ពីបទលួចមានស្ថានទម្ងន់ទោស (ឆក់ទូរស័ព្ទដៃ) ប្រព្រឹត្ដិនៅវេលាម៉ោង ៩ និង៣០នាទីយប់ថ្ងៃទី១១ ខែមករា ឆ្នាំ២០២០ នៅចំណុចផ្លូវលេខ១៦៣ កែង២៧៦ ភូមិ៤ សង្កាត់អូឡាំពិក ខណ្ឌបឹងកេងកង រាជធានីភ្នំពេញ ។

ជនសង្ស័យឈ្មោះ ជន ម៉េងហាក់ ភេទ ប្រុស អាយុ ២៤ ឆ្នាំ ជនជាតិខែ្មរ សញ្ជាតិខ្មែរ មុខរបរមិនពិតប្រាកដ ទីលំនៅស្នាក់នៅផ្ទះជួលផ្លូវ១៦៦ សង្កាត់អូរឬស្សី ខណ្ឌ៧មករា រាជធានីភ្នំពេញ។

វត្ថុតាងចាប់យកមាន៖
– ទូរស័ព្ទ១ គ្រឿង ម៉ាកសាំសុងកាឡាក់ស៊ីអេ៦ ពណ៍ខ្មៅ (ជារបស់ជនរគ្រោះ )។

ដំណើររឿងហេតុ៖ មុនពេលកើតហេតុថ្ងៃទី១១ ខែមករា ឆ្នាំ២០២០ វេលាម៉ោង ៨ និង៤០នាទីយប់ ជនរងគ្រោះ បានចេញដំណើរពីផ្សាររាត្រីមាត់ទន្លេ គោលបំណងដើរត្រលប់មកផ្ទះវិញ នៅម្ដុំទួលទំពូងទី២ លុះដើរដល់កន្លែងកើតហេតុ ស្រាប់តែមានជនសង្ស័យម្នាក់ បានដើរមកពីក្រោយ ភ្លាមៗនោះ ជនសង្ស័យ បានធ្វើសកម្មភាពឆក់ទូរស័ព្ទ ដែលជនរងគ្រោះ កំពុងកាន់ក្នុងដៃ បានសម្រេច រួចរត់គេចខ្លួន បន្ទាប់មកជនរងគ្រោះ ក៏រត់ដេញតាម និងស្រែកឲ្យគេជួយ ទើបមានអ្នកធ្វើដំណើរតាមផ្លូវ ជួយចាប់បានជនសង្ស័យ។

មួយសន្ទុះក្រោយមក កម្លាំងសមត្ថកិច្ចមូលដ្ឋានល្បាត បានទៅដល់ទីតាំងកើតហេតុ ធ្វើការឃាត់ខ្លួនជនសង្ស័យ រួមទាំងវត្ថុតាង យកទៅទីស្នាក់ការប៉ុស្ដិ៍នគរបាល រដ្ឋបាលអូឡាំពិក ដើម្បីសួរនាំ រួចបញ្ជូនទៅអធិការដ្ឋាននគរបាលខណ្ឌបឹងកេងកង ដើម្បីចាត់ការតាមនីតិវិធីច្បាប់៕