បន្ទាយមានជ័យ: យោងតាមផេករបស់ការិយាល័យផ្សព្វផ្សាយតាមបណ្តាញសង្គម បានឲ្យដឹងថា បុរសម្នាក់បានស្លាប់ និងម្នាក់ទៀតបានរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍បង្កឡើងដោយរថយន្តឡុចស៊ីស៣៣០បែកកង់មុខ ។ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង ៧និង៣៥ នាទីព្រឹក ថ្ងៃទី១២ ខែមករា ឆ្នាំ២០២០ នៅលើកំណាត់ផ្លូវជាតិលេខ៦ ចំណុចស្ពានទី២ ស្ថិតក្នុងភូមិ១ សង្កាត់ព្រះពន្លា ខេត្តបន្ទាយមានជ័យ ។

ប្រភពព័ត៌មានពីនគរបាលបានឲ្យដឹងថា ៖ មុនពេលកើតហេតុមានរថយន្តម៉ាឡុចស៊ីស១គ្រឿង ពណ៌ស ពាក់ស្លាកលេខ ភ្នំពេញ 2AJ 8959 អ្នកបើកបរមិនស្គាល់អត្តសញ្ញាណរត់គេខ្លួនបាត់ បានធ្វើដំណើរ ពីទិសខាងកើតទៅលិច ក្នុងល្បឿនលឿន ពេលមកដល់ចំណុចកើតហេតុ រថយន្តបែកកង់បានេរចង្កូតទៅខាងឆ្វេងដៃ បុកម៉ូតូ១គ្រឿងម៉ាកហុងដា ពណ៌ខ្មៅពាក់ស្លាកលេខ បន្ទាយមានជ័យ 1I 9223 បណ្តាលឲ្យអ្នកបើកបរម៉ូតូស្លាប់ និងអ្នកដំណើររងរបួសធ្ងន់ ។ ជនរងគ្រោះមិនត្រូវបានគេស្គាល់ឈ្មោះនោះដែរ ។

គួរបញ្ជាក់ថា ៖ ក្នុងរយ:ពេល២ថ្ងៃនេះ ក្នុងក្រុងសិរីសោភ័ណ ខេត្តបន្ទាយមានជ័យ មានមនុស្សស្លាប់ចំនួន២នាក់ និងរបួសធ្ងន់ចំនួន២នាក់ជាបន្តបន្ទាប់ ក្នុងហេតុការណ៍គ្រោះថ្នាក់ចរាចរណ៍ ដែលបង្កឡើងដោយរថយន្តបុកម៉ូតូ ។ប្រជាពលរដ្ឋ បានសំណូមពរដល់កម្លាំងនគរបាលចរាចរណ៍ ឲ្យធ្វើការរឹតបន្តឹងខាងច្បាប់ចរាចរណ៍ចំពោះអ្នកបើកបរយានយន្តគ្រប់ប្រភេទ ឲ្យគាត់គោរពច្បាប់ចរាចរណ៍ ដើម្បីរួមគ្នាកាត់បន្ថយអត្រាគ្រោះថ្នាក់ចរាចរណ៍ក្នុងខេត្តបន្ទាយមានជ័យនេះ ៕