ភ្នំពេញ: ជនសង្ស័យម្នាក់ត្រូវកម្លាំងនរគបាលប៉ុស្តិ៍ឃាត់ខ្លួនជាក់ស្តែង បន្ទាប់ពីលួចកាច់កម៉ូតូ មកផ្លាស់ប្តូរផ្លាកលេខបានហើយនៅចំណុចបឹងកក់
ផ្ទះលេខ៦២ ផ្លូវលេខ៧០ ក្រុម២៥៦ កាលពីវេលាម៉ោង៩៖៤០នាទី ថ្ងៃទី២៩ ខែកក្កដា ឆ្នាំ២០១៦ ស្ថិតនៅសង្កាត់ស្រះចក ខណ្ឌដូនពេញ រាជធានីភ្នំពេញ ។
នរគបាលប៉ុស្តិ៍ស្រះចកបានប្រាប់ឲ្យដឹងថា ជនរងគ្រោះឈ្មោះ ធឿន ម៉េងលុន ភេទប្រុស អាយុ២៥ឆ្នាំ មុខរបរសន្តិសុខក្រុមហ៊ុម GSS ស្នាក់នៅចំណុចផ្ទះជួល ផ្លូវលំ ក្រុម៥ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ជាម្ចាស់ ម៉ូតូម៉ាកហុងដាឌ្រីម សេរី២០១៣ ពណ៌ខ្មៅ ពាក់ស្លាកលេខ ភ្នំពេញ 1BT-2140 បានទុកម៉ូតូនៅខាងមុខបន្ទប់ជួល បន្ទាប់ត្រឡប់ពីធ្វើការងារវេនយប់ដែលចាប់ពីម៉ោង៦ល្ងាចដល់ម៉ោង៦ព្រឹក រហូតដល់ម៉ោងកើតហេតុខាងលើ ក៏ស្រាប់តែមាននរគបាលទៅគោះទ្វារប្រាប់ថា ម៉ូតូត្រូវបានគេលួចយកទៅបាត់ហើយ។
នរគបាលបន្តទៀតថា ជនសង្ស័យឈ្មោះ ញ៉ែម សុភារ៉ា ហៅអារស់ ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅផ្ទះលេខ៦២ ផ្លូវលេខ៧០ ក្រុម២៥៦ សង្កាត់ស្រះចក ខណ្ឌដូនពេញ រាជធានីភ្នំពេញ និងមានស្រុកកំណើតនៅ សង្កាត់ស្រះចក ខណ្ឌដូនពេញ បានធ្វើសកម្មភាពលួចកម៉ូតូនៅចំណុចផ្ទះជួល ផ្លូវលំ ក្រុម៥ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ បានសម្រេចក៏យកម៉ូតូមកដោះផ្លាកលេខបម្រុងយកទៅលក់បញ្ចាំត្រូវបានកម្លាំងនរគបាលប៉ុស្តិ៍ស្រះចកប្រទះឃើញ និងឃាត់ខ្លួនរួមទាំងវត្ថុតាងជាក់ស្តែងតែម្តង។
លោកនាយប៉ុស្តិ៍ស្រះចកបានបញ្ជាក់ថា មុខឈានដល់ការចាប់ឃាត់ខ្លួនជនសង្ស័យរួមទាំងវត្ថុតាងដោយមានការរាយការណ៍ពីប្រជាពលរដ្ឋរបស់មូលដ្ឋាន ឃើញជនសង្ស័យបានយកម៉ូតូ និងដោះស្លាកលេខបានតេទូស័ព្ទប្រាប់នាយប៉ុស្តិ៍តែម្តង។
បច្ចុប្បន្ន ម៉ូតូបានប្រគល់ជូនម្ចាស់វិញ ហើយជនសង្ស័យត្រូវបានឃុំខ្លួនបណ្តោះអាសន្ន នៅប៉ុស្តិ៍នរគបាលស្រះចក ដើម្បីកសាងសំណុំរឿងចាត់ការតាមនីតិវិធី៕
មតិយោបល់