ភ្នំពេញ: សមាជិកក្រុមប្រឹក្សាខណ្ឌទួលគោកបានស្នើឲ្យអភិបាលគណ:នៃអភិបាលខណ្ឌទួលគោកថា ការជ្រើសរើសប្រធានការិយាល័យខណ្ឌថ្មី ត្រូវតែជាមនុស្សដែលមានសមត្ថភាព និងមិនពាក់ព័ន្ធសែស្រឡាយ ឬបក្ខពួកនិយម។

ការស្នើឡើងបែបនេះត្រូវបានធ្វើឡើងក្នុងកិច្ចប្រជុំសាមញ្ញលើកទី២៦របស់ក្រុមប្រឹក្សាខណ្ឌទួលគោកកាលពីព្រឹកថ្ងៃទី២៩ កក្កដាឆ្នាំ២០១៦នៅសាលាខណ្ឌទួលគោក ដោយមានវត្តមានលោកឯក ឃុនដឿន អភិបាលខណ្ឌទួលគោក សមាជិកក្រុមប្រឹក្សា រួមនឹងអាជ្ញាធរមានសមត្ថកិច្ចរបស់ខណ្ឌជាច្រើនចូលរួមផងដែរ ហើយការស្នើឡើងនេះក៏ស្របពេលជាមួយដែលលោកឯក ឃុនដឿន បានបង្ហាញឲ្យសមាជិកក្រុមប្រឹក្សាបានដឹងជុំវិញការជ្រើសរើសប្រធានការិយាល័យថ្មីនេះផងដែរ។

លោក ឯក ឃុនដឿន បានលើកឡើងក្នុងកិច្ចប្រជុំក្រុមប្រឹក្សានោះថា រដ្ឋបាលខណ្ឌទួលគោកបានជ្រើសរើសប្រធានការិយាល័យថ្មីចំនួន៣រូប ដើម្បីមកបំពេញការងារនៅក្នុងរដ្ឋបាលខណ្ឌ ក្រោយពីប្រធានចាស់បានចូលនិវត្តអស់ហើយនោះ ក្នុងនោះរួមមានប្រធានការិយាល័យផែនការ ប្រធានការិយាល័យលទ្ធកម្មនិងប្រធានការិយាល័យធម្មការ។

លោកក៏បានបញ្ជាក់ផងដែរថា ប្រធានការិយាល័យថ្មីនេះរដ្ឋបាលខណ្ឌនឹងជ្រើសរើសយកមកធ្វើនោះ គឺជាមន្ត្រីដែលបម្រើការងារនៅក្នុងការិយាល័យនោះតែម្តង មិនយកមន្ត្រីមកពីខាងក្រៅនេះទេ ហើយក៏ជាមនុស្សដែលមានសមត្ថភាពក្នុងការបំពេញការងារលើមុខជំនាញនេះផងដែរ៕