បាត់ដំបង: នៅព្រឹកថ្ងៃទី២៦ ខែមករា ឆ្នាំ២០២០ ករណីក្មេងៗប្រុស៤នាក់ វាយសិស្សស្រីម្នាក់ បណ្ដាលឲ្យរបួសចិញ្ចើម ពេលនេះ សមត្ថកិច្ច បានកសាងសំណុំរឿង បញ្ជូនទៅតុលាការខេត្ត ដើម្បីចាត់ការហើយ។

ជនរងគ្រោះឈ្មោះ គី លីណា ភេទស្រី អាយុ១៣ឆ្នាំ ជាសិស្សអនុវិទ្យាល័យកូនភ្នំមិត្តភាព។ ចំណែកក្មេងប្រុសៗ ដែលបង្កហិង្សាទី១-ឈ្មោះ ថា កក្កដា ភេទប្រុស អាយុ១២ឆ្នាំ ទី២-ឈ្មោះ ទូច សុផាត ភេទប្រុស អាយុ១២ឆ្នាំ ទី៣-ឈ្មោះ និន សម្បត្តិចិត្រា ភេទប្រុស អាយុ១៣ឆ្នាំ និងទី៤-ឈ្មោះ អ៊ួញ សៅលី ភេទប្រុស អាយុ១៣ឆ្នាំ។

ករណីហិង្សានេះ កើតទ្បើងកាលពីថ្ងៃទី២២ ខែមករា ឆ្នាំ២០២០ នៅអនុវិទ្យាល័យកូនភ្នំមិត្តភាព ស្ថិតក្នុងភូមិស្រឡៅជ្រំ ឃុំសិរីមានជ័យ ស្រុកសំពៅលូន ខេត្តបាត់ដំបង។

ដំណើររឿង៖ មុនកើតហេតុជនរងគ្រោះ បាននិយាយចំអន់ ទៅកាន់សិស្សប្រុសក្មេងៗ ទាំង៤ខាងលើថាជាប្ដី។ ប៉ុន្តែសិស្សប្រុសម្នាក់ បានហាមកុំឲ្យជនរងគ្រោះ ហៅខ្លួនជាប្ដីទៀត។

នៅពេលនោះ ក៏មានការទាស់សម្ដីគ្នា ជនរងគ្រោះ បានធាក់សិស្សប្រុសម្នាក់ ចំពោះបណ្ដាលឲ្យចុករមួល ឃើញដូច្នោះសិស្សប្រុសក្មេងៗទាំងនោះ ក៏នាំគ្នាវ៉ៃទៅលើជនរងគ្រោះតែម្ដង។

ដោយមានសិស្សប្រុសម្នាក់​ បានយកខ្សែក្រវាត់ ក្រវីត្រូវចិញ្ចើមខាងស្ដាំជនរងគ្រោះ បណ្ដាលឲ្យរបួសដេរ ៣ថ្នេរ។

ករណីនេះដែរ ក្មេងៗទាំង ៤នាក់ ត្រូវសមត្ថកិច្ច សាកសួរ រួចរៀបចំសំណុំរឿងបញ្ជូនទៅតុលាការ ប៉ុន្តែដោយសារតែពួកគេ ជាអនិតិជន ទើបខាងសមត្ថកិច្ច បានត្រឹមតែបញ្ជូនសំណុំរឿង តែប៉ុណ្ណោះ និងឲ្យអាណាព្យាបាល មកធ្វើលិខិតធានាយកទៅវិញ។

ដោយទ្បែកក្មេងស្រីរងគ្រោះ បានទាមទារសំណងចំនួន ១២លានរៀល ពីក្មេងៗទាំង៤ នាក់ ខណ:ដែលម្ដាយឪពុកពួកគេ ពុំមានលទ្ធភាព សុំបង់ប្រាក់ត្រឹម៨០ម៉ឺនរៀល តែជនរងគ្រោះនៅតែរក្សាជំហរ មិនព្រមទទួលទ្បើយ៕