ភ្នំពេញ: រថយន្តពីរគ្រឿង បើកបោះពួយយ៉ាងលឿន មិនប្រយ័ត្នមកដល់ផ្លូវបំបែកជាបួន បានបុកគ្នាពេញទំហឹង បណ្ដាលឲ្យរងការខូចខាតយ៉ាងដំណំ។

ហេតុការណ៍នេះ កើតទ្បើងកាលពីវេលាម៉ោង ៣និង៣០នាទីទៀបភ្លឺ ឈានចូលថ្ងៃទី៨ ខែកុម្ភ: ឆ្នាំ២០២០ ត្រង់ចំណុចស្តុបជាប់ក្រសួងសុខាភិបាល តាមបណ្ដោយផ្លូវ២៨៩ កែងនិងផ្លូវ៥៦៦ ស្ថិតក្នុងសង្កាត់បឹងកក់ទី២ ខណ្ឌទួលគោក។

ដំណើររឿង៖ នៅមុនកើតហេតុ គេឃើញបុរសម្នាក់ បើករថយន្ត១គ្រឿង ម៉ាក PEUGEOT ពណ៌ខ្មៅ ពាក់ផ្លាកលេខ ភ្នំពេញ 2T-5518 ធ្វើដំណើរពីត្បូងទៅជើង តាមបណ្ដោយផ្លូវ២៨៩ ក្នុងល្បឿនយ៉ាងលឿន។ លុះមកដល់ចំណុចកើតហេតុ រថយន្តខាងលើ បានបត់ឆ្វេងទៅផ្លូវ៥៦៦ ស្របពេលនោះ ក៏មានរថយន្តដឹកគ្រឿងសមុទ្រ ១គ្រឿងទៀត ពណ៌សជាប្រភេទសាំយ៉ុង ១២កៅអី ពាក់ផ្លាកលេខ ភ្នំពេញ 2F-9478 បើកបរដោយបុរសម្នាក់ ធ្វើដំណើរតាមបណ្ដោយផ្លូវ២៨៩ ក្នុងទិសដៅបញ្រ្ចាសគ្នា ជាមួយល្បឿនយ៉ាងលឿន មិនប្រយ័ត្ន ក៏ជ្រុលទៅបុករថយន្ដខាងលើពេញទំហឹង បណ្ដាលឲ្យរថយន្តសាំយ៉ុង ខ្ទាតឡើងខឿនរងការខូចខាតផ្នែកខាងមុខយ៉ាងដំណំ។ ចំណែកឯរថយន្ត PEUGEOT បានខ្ទាតបែរក្បាលត្រលប់ក្រោយ រងការខូចខាតមួយកំណាត់មុខ។

ដោយទ្បែងអ្នកបើករថយន្តទាំងពីរគ្រឿង បានរងរបួសស្រាល ត្រូវបានរថយន្តសង្គ្រោះបន្ទាន់ ដឹកយកទៅសង្រ្គោះ ភ្លាមៗតែម្តង។

ក្រោយកើតហេតុ ក៏មានសមត្ថកិច្ចមូលដ្ឋាន បានមកដល់ហើយឲ្យតំណាងរថយន្តទាំងពីរគ្រឿង ធ្វើការដោះស្រាយគ្នា ដោយមិនចង់មានរឿងរ៉ាវវែងឆ្ងាយ ភាគីទាំងពីរ សម្រេចយករថយន្ត ទៅជួសជុលដោយខ្លួនឯងរៀងៗខ្លួន៕