ផ្ទះ ព័ត៌មានជាតិ រថយន្តក្រុមហ៊...

រថយន្តក្រុមហ៊ុនភេសជ្ជ​ប៉ូវកម្លាំង «ប៊ូសស្ត្រង» បើកទាក់ខ្សែភ្លើង បាក់អស់៤បង្គោល និងឆក់បុរសម្នាក់ ដួលសន្លប់ស្ដូក

0

ភ្នំពេញ: បុរសមិនស្គាល់អត្តសញ្ញាណម្នាក់ បានបើករថយន្តដឹកទូរកុងតឺន័រ១គ្រឿង មិនប្រយ័ត្ន មកទាក់នឹងខ្សែភ្លើង បណ្តាលឲ្យបាក់អស់ចំនួន ៤បង្គោល។

ហេតុការណ៍នេះ បានកើតឡើងកាលពីវេលាម៉ោង១០ និង៣០នាទីយប់ថ្ងៃទី១៧ ខែមីនា ឆ្នាំ២០២០ តាមបណ្តោយផ្លូវ១៨០០ ត្រង់ចំណុចក្បែរផ្លូវបំបែក ទៅផ្សារអ៊ីអន២ ស្ថិតក្នុងសង្កាត់ទួលសង្កែ២ ខណ្ឌឬស្សីកែវ។

សមត្ថកិច្ច បានឲ្យដឹងថា មុនកើតហេតុ គេឃើញរថយន្ត១គ្រឿង ម៉ាកហ៊ីយ៉ាន់ដាយ ប្រភេទដឹកទូរកុងតឺន័រ របស់ក្រុមហ៊ុនភេសជ្ជ​ប៉ូវកម្លាំង «ប៊ូសស្ត្រង» ពណ៌ខៀវ ពាក់ផ្លាកលេខ ព្រៃវែង 3A-0153 ធ្វើដំណើរពីកើតទៅលិច។ លុះមកដល់ចំណុចកើតហេតុ មិនប្រយ័ត្ន ក៏ទាក់ត្រូវខ្សែភ្លើង បណ្តាលឲ្យបាក់អស់ ៤បង្គោល ហើយខ្សែភ្លើងទាក់ជាប់ នឹងរថយន្តបង្ក រងការខូចខាត។

ភ្លាមៗនោះ សមត្ថកិច្ច បានចុះអន្តរាគមន៍ នៅនឹងកន្លែងកើតហេតុផងដែរ ដោយអ្នកបើករថយន្តបង្ក ត្រូវបានឃាត់យកទៅសួរនាំ នៅប៉ុស្តិ៍រដ្ឋបាលនគរបាលទួលសង្កែ២ ហើយមួយសន្ទុះក្រោយមក ក៏មានក្រុមអគ្គិសានី បានមកដល់កន្លែងកើតហេតុ ដើម្បីរៀបចំខ្សែភ្លើង មិនប្រយ័ត្ន បណ្ដាលឲ្យឆក់បុរសម្នាក់ ដួលសន្លប់ស្តូកស្តឹង តែម្ដង។

ក្រោយកើតហេតុរថយន្តបង្ក ត្រូវសមត្ថកិច្ច យកទៅរក្សាទុកឲ្យនៅការិយាល័យចរាចរណ៍ផ្លូវគោក ដើម្បីកសាងសំណុំរឿង ចាត់ការតាមផ្លូវច្បាប់៕

មតិយោបល់