ភ្នំពេញ: បុរស២នាក់បានរងរបួសធ្ងន់ ដោយសាររថយន្តកាមរីបាឡែនមួយគ្រឿងបុកយ៉ាងពេញទំហឹង រួចបើកគេចខ្លួនបាត់ស្រមោល កាលពីវេលាម៉ោង ១និង២០នាទីរំលងអាធ្រាត្រ ឈានចូលថ្ងៃទី០២ ខែសីហា ឆ្នាំ២០១៦ ក្បែរនិងរង្វង់មូលផ្សារដើមថ្កូវ ក្នុងសង្កាត់ផ្សារដើមថ្កូវ ខណ្ឌចម្ការមន។
តាមប្រភពពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញរថយន្តម៉ាកកាមរីបាឡែនមួយគ្រឿង ពណ៌ស្ករ ពាក់ស្លាកលេខ ភ្នំពេញ 2V-8919បើកក្នុងល្បឿនលឿនតាមបណ្តោយផ្លូវលេខ២៧១ បត់ស្តាំចុះទៅរង្វង់មូលផ្សារដើមថ្កូវ ខណ:នោះមានម៉ូតូម៉ាកគ្រីសមួយគ្រឿង មិនចាំស្លាកលេខ បានជិះចេញពីរង្វង់មូលឡើងទៅលើផ្លូវលេខ២៧១ វិញ ក៏ត្រូវរថយន្តនោះបុកចំពីមុខម៉ូតូយ៉ាងពេញទំហឹង បណ្តាលឲ្យប៉ើងបុរស២នាក់ខ្ទាតទៅលើថ្នល់រងរបួសធ្ងន់ ចំណែករថយន្តបង្កបានព្យាយាមបើករត់គេចខ្លួនបាត់ស្រមោល។ បន្ទាប់មករថយន្តសាមុយបានមកដល់កន្លែងកើតហេតុ បានដឹកជនរងគ្រោះទាំង២នាក់ទៅសង្គ្រោះនៅមន្ទីរពេទ្យ។
ក្រោយពេលកើតហេតុ សមត្ថកិច្ចបានមកដល់កន្លែងកើតហេតុ បានយកម៉ូតូទៅរក្សាទុកនៅប៉ុស្តិ៍នគរបាលផ្សារដើមថ្កូវ រងចាំជនរងគ្រោះមកទទួលយកវិញ៕
មតិយោបល់