កណ្ដាល: យោងតាមផេកការិយាល័យផ្សព្វផ្សាយតាមបណ្តាញសង្គម បានឲ្យដឹងថា បុរសចំណាស់ម្នាក់ ត្រូវខ្សែភ្លើងឆក់ស្លាប់ បន្ទាប់ឡើងតខ្សែភ្លើងលើបង្គោលភ្លើង ចុះមកវិញភ្លេចយកក្រមា ក៏ឡើងលើបង្គោលភ្លើងម្ដងទៀត ក៏ត្រូវខ្សែភ្លើងឆក់តែម្ដង ។ ករណីនេះ បានកើតឡើងកាលពីវេលាម៉ោង១០ និង២៥នាទី ថ្ងៃទី២០ ខែមេសា ឆ្នាំ២០២០ ត្រង់ចំណុចបង្គោលភ្លើងលេខ០៨៨ជាប់ផ្លូវកៅស៊ូមាត់ទន្លេ ស្ថិតក្នុងភូមិព្រែកយាយហ៊ិនទី២ ឃុំឫស្សីជ្រោយ ស្រុកមុខកំពូល ខេត្តកណ្ដាល ។

មន្ត្រីនគរបាលស្រុកមុខកំពូលបានឲ្យដឹងថា ជនរងគ្រោះឈ្មោះ ជា ភួង ភេទប្រុស អាយុ៧៥ ឆ្នាំ ជនជាតិខ្មែរ មានទីលំនៅភូមិព្រែកយីហ៊ិនទី២ ឃុំឫស្សីជ្រោយ ស្រុកមុខកំពូល ខេត្តកណ្ដាល ។
ប្រភពដដែលបន្តថា នៅមុនពេលកើតហេតុជនរងគ្រោះបានអូសខ្សែភ្លើងចេញផ្ទះទៅបង្គោលភ្លើងដើម្បីប្តូរខ្សែភ្លើងចាស់ចោល ខណ:ដែលជនរងគ្រោះបានឡើងលើបង្គោលដោយស្លៀកក្រមាជាប់នឹងខ្លួន បន្ទាប់មកយកក្រមានៅលើបង្គោលភ្លើង ហើយចុះមកវិញភ្លេចយកក្រមាចុះ ក៏ឡើងបង្គោលភ្លើងម្ដងទៀតដើម្បីយកក្រមា តែបែរជាត្រូវខ្សែភ្លើងឆក់បណ្ដាលឲ្យធ្លាក់ពីលើបង្គោលចុះមកក្រោមស្លាប់ភ្លាមៗតែម្ដង ។ ភ្លាមៗនោះបានផ្អើលឆោឡោដល់ប្រជាពលរដ្ឋជិតខាងជួយធ្វើចលនា និងហៅគ្រូពេទ្យជួយសង្គ្រោះ តែទោះជាយ៉ាងណាក៏ជនរងគ្រោះស្លាប់បាត់បង់ជីវិតដដែល ។

ក្រោយពីមានហេតុការណ៍កម្លាំងនគរបាលប៉ុស្តិ៍ និងកម្លាំងស្រុកបានចុះមកធ្វើពិនិត្យកន្លែងកើតហេតុ រួចពិនិត្យសាកសពដោយបញ្ជាក់ថា ជនរងគ្រោះពិតជាស្លាប់ដោយសារឆក់ចរន្តអគ្គិសនីប្រាកដមែន ។ សាកសពត្រូវបានសមត្ថកិច្ចប្រគល់ទៅឲ្យក្រុមគ្រួសារជនរងគ្រោះយកទៅធ្វើបុណ្យតាមប្រពៃណី ៕