ភ្នំពេញ: កម្លាំងសមត្ថកិច្ច បានស្រាវជ្រាវ រហូតឈានដល់ឃាត់ខ្លួនជនដៃដល់បានហើយ បន្ទាប់ពីព្យាយាមរត់ក្រោយ ធ្វើសកម្មភាពប៉ុន្មានម៉ោង ក្នុងករណីរំលោភសម្លាប់នារីម្នាក់ ស្លាប់ទាំងអាក្រាតកាយ។

ជនរងគ្រោះឈ្មោះ ស៊ាត ស៊ន ភេទស្រីអាយុ ២៨ឆ្នាំ ជាកម្មការនីរោងចក្រ មានស្រុកកំណើតនៅភូមិចារ ឃុំព្រៃរំដេង ស្រុកមេសាង ខេត្តព្រៃវែង ត្រូវបានជនដៃដល់ វាយនិងយកកាំបិតចាក់។ ចំណែកជនសង្ស័យឈ្មោះ វង់ ភារម្យ ភេទប្រុស អាយុ ២៨ឆ្នាំ ជនជាតិខ្មែរ ទីលំនៅបន្ទប់ជួលគ្មានលេខផ្លូវបេតុង ភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ មុខរបរកម្មករសំណង់ (ឃាត់ខ្លួនមានផ្ទុកសារធាតុញៀន)។

ដោយនារីរងគ្រោះ ត្រូវបានគេប្រទះឃើញដេកស្លាប់ ក្នុងថ្លុកឈាមទាំងអាក្រាតកាយល្វែងខាងក្រោម នៅវេលាម៉ោងជាង៧យប់ ថ្ងៃទី២៨ ខែមេសា ឆ្នាំ២០២០ នៅក្នុងបន្ទប់ជួលជាន់ទី២ ស្ថិតក្នុងភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។

សូមបញ្ជាក់៖ ករណីជនសង្ស័យបានមកជួលបន្ទប់ជាប់ក្បែរជនរងគ្រោះ បានតែ ៣ថ្ងៃ ប៉ុណ្ណោះ ក៏មានគំនិតប៉ុនប៉ងរំលោភនារីកម្មការនីរោងចក្រ មិនបានសម្រេចខ្លាចបែកការ សម្រេចចិត្តចាក់នារីរងគ្រោះបណ្ដាលឲ្យស្លាប់ យ៉ាងអាណោចអធ័មក្នុងថ្លុកឈាម ហើយរត់ក៏រត់គេចខ្លួន មិនបានមួយយប់ផង ក៏ត្រូវសមត្ថកិច្ចចាប់ឃាតករបានភ្លាមៗ។ ចំណែកប្ដីគ្រាន់តែទទួលបានព័ត៌មានភ្លាម ជិះរថយន្តពីខេត្តកំពត មកទទួលសពប្រពន្ធនៅភ្នំពេញទាំងអារម្មណ៍ក្ដុកក្ដួល ទ្រហោយំបន្សល់ទុកកូនប្រុសកំព្រា អាយុ ៧ឆ្នាំ គ្មានម្ដាយបីបាច់ថែរក្សា រីឯឪពុកជនរងគ្រោះវិញ និយាយលែងចេញអ្វីទាំងអស់ ដោយសារតែស្ដាយកូន មានអត្តចរិតសុភាពរាបសារ អ្នកភូមិស្រុកស្រឡាញ់ចូលចិត្ត សរសើរមិនដាច់ពីមាត់ ហើយគាត់បានសំណូមពរឲ្យសមត្ថកិច្ច ដាក់ទោសទណ្ឌឃាតករឲ្យបានធ្ងន់ធ្ងរ ជនរងគ្រោះសព្វថ្ងៃកំព្រាម្ដាយមានតែឪពុក ហើយក៏ទើបតែមកជួលបន្ទប់ថ្មីនេះបានប្រហែល ៣ខែ ស្រាប់តែជួបរឿងអកុសលបែបនេះ។

បច្ចុប្បន្នជនដៃដល់ កំពុងត្រូវបានសមត្ថកិច្ច កសាងសំណុំរឿង ចាត់ការតាមនីតិវិធីច្បាប់៕