ភ្នំពេញៈ ជនសង្ស័យជាមុខសញ្ញាឆក់ ០៣នាក់ ត្រូវកម្លាំងជំនាញខណ្ឌសែនសុខស្រាវជ្រាវ ទៅចាប់ដល់ផ្ទះ ក្រោយធ្វើសកម្មភាពឆក់កាបូបបានសម្រេច និងគេចខ្លួនបានមួយយប់។ ឃាត់ខ្លួនកាលពីម៉ោង ៩និង៣០នាទីព្រឹកថ្ងៃទី២៩ ខែមិថុនា ឆ្នាំ២០២០ នៅស្របផ្លូវរថភ្លើងភូមិប៉ប្រកខាងជើង សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។

ជនរងគ្រោះឈ្មោះ SAHASHI AKIMASA អាយុ ៣៧ឆ្នាំ ជនជាតិ ជប៉ុន មុខរបរគ្រូបង្រៀន ស្នាក់នៅសង្កាត់គោកឃ្លាង ខណ្ឌសែនសុខ រាជធានីភ្នំពេញ។

ជនសង្ស័យ ៣នាក់៖
១/ឈ្មោះ ថង សុវណ្ណ អាយុ ១៩ឆ្នាំ មុខរបរមិនពិតប្រាកដ។
២/ឈ្មោះ សុខ ចន្ត្រី អាយុ ១៩ឆ្នាំ មុខរបរមិនពិតប្រាកដ
៣/ឈ្មោះ ដួង ចិន អាយុ ២០ឆ្នាំ មុខរបរមិនពិតប្រាកដទាំង ៣នាក់ ស្នាក់នៅភូមិប៉ប្រកខាងជើង សង្កាត់កាកាប១ ខណ្ឌពោធិ៍សែនជ័យ។

ប្រភពពីសមត្ថកិច្ចបានឲ្យដឹងថា កាលពីរសៀលថ្ងៃទី២៨ ខែមិថុនា ឆ្នាំ២០២០ មានជនសង្ស័យ ០៣នាក់ ជិះម៉ូតូ ២គ្រឿង(ស្កូបពីមួយគ្រឿងនិងម៉ាកនិកមួយគ្រឿង) មកធ្វើសកម្មភាពឆក់យកកាបូបស្ពាយពីជនរងគ្រោះជាជនជាតិជប៉ុន ខណៈកំពុងជិះ PassApp នៅចំណុចផ្លូវ១៩២៨ ក្នុងសង្កាត់ភ្នំពេញថ្មី ខណ្ឌសែនសុខ បានសម្រេចគេចខ្លួនដោយសុវត្តិភាព។

សមត្ថកិច្ចឲ្យដឹងទៀតថា ក្រោយហេតុការណ៍កើតឡើងសមត្ថកិច្ចជំនាញផ្នែកព្រហ្មទណ្ឌខណ្ឌ ក៏ចុះធ្វើការស្រាវជ្រាវភ្លាមៗ កំណត់បានមុខសញ្ញាខាងលើ រហូតដល់ព្រឹកថ្ងៃទី២៩ ខែមិថុនា ឆ្នាំ២០២០ ក៏ឈានទៅឃាត់ខ្លួនមុខសញ្ញាខាងលើ ដល់លំនៅដ្ឋានតែម្តង ព្រមទាំងដកហូតបានម៉ូតូ ២គ្រឿង ជាមធ្យោបាយល្មើសផង។

បច្ចុប្បន្នជនសង្ស័យទាំង ៣នាក់ ត្រូវបានឃាត់ខ្លួនសាកសួរបណ្តោះអាសន្ន នៅផ្នែកជំនាញ នៃអធិការដ្ឋាននគរបាលខណ្ឌសែនសុខ៕