ភ្នំពេញ: ករណីគ្រោះថ្នាក់ចរាចរណ៍មួយដែលបុរសម្នាក់ បើកបររថយន្តបែនដឹកដីមួយគ្រឿង បួងចង្កូតមិនទាន់បានជ្រុលទៅបុកម៉ូតូមួយគ្រឿង បណ្ដាលឲ្យស្ត្រីម្នាក់កំពុងជិះផ្លោងចូលក្នុងព្រៃ បណ្តាលឲ្យរងរបួសធ្ងន់ ត្រូវបានបញ្ជូនទៅមន្ទីរពេទ្យភ្លាមៗ ករណីនេះបង្កការភ្ញាក់ផ្អើលកើតឡើង នៅវេលាម៉ោង០៧និង១០នាទីព្រឹកថ្ងៃទី០៤ ខែកក្កដា ឆ្នាំ ២០២០ ស្ថិតនៅតាមបណ្ដោយផ្លូវបេតុង ក្នុងសង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។

តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញមានស្ត្រីម្នាក់ជិះម៉ូតូម៉ាកសង់សេ125 ពណ៌ខ្មៅ ពាក់ផ្លាកលេខភ្នំពេញ1GI 8730ធ្វើដំណើរក្នុងទិសដៅពីកើត ទៅលិចលុះមកដល់ត្រង់ចំណុចកើតហេតុ ស្រាប់តែមានរថយន្តបែនដឹកដីមួយគ្រឿង គ្មានពាក់ផ្លាកលេខបើកបរដោយបុរសម្នាក់ ក្នុងទិសដៅពីលិចទៅកើត​ក្នុងល្បឿនលឿន​​ រួចបួងចង្កូតមិនទាន់ក៏ជ្រុលទៅបុកម៉ូតូ បណ្ដាលឲ្យស្ត្រីម្នាក់ខ្ទាតចេញពីផ្លូវចូលក្នុងព្រៃ រងរបួសធ្ងន់ ត្រូវបានប្រជាពលរដ្ឋនៅក្បែរនោះទំនាក់ទំនងរថយន្តសង្គ្រោះបន្ទាន់ ដឹកយកទៅមន្ទីរពេទ្យភ្លាមៗ ចំណែកឯម្ចាស់រថយន្តបង្ក ត្រូវបានសមត្ថកិច្ចឃាត់ខ្លួនយកទៅប៉ុស្តិ៍នគរបាលរដ្ឋបាលកាកាបទី២ ។

ក្រោយកើតហេតុសមត្ថកិច្ចមូលដ្ឋាន បានមកដល់រួចទាក់ទងទៅសមត្ថកិច្ចជំនាញចរាចរណ៍ ធ្វើការវាស់វែងយករថយន្តបង្កនិងម៉ូតូជនរងគ្រោះទៅរក្សាទុក រង់ចាំធ្វើការដោះស្រាយគ្នានៅពេលក្រោយ តាមនីតិវិធីផ្លូវច្បាប់ ៕