ព័ត៌មានជាតិ

ពន្ធនាគារ​ខេត្តបន្ទាយមានជ័យ​ ត្រូវ​រង​នូវ​ទឹក​ជន់​លិច​យ៉ាង​គំហុក​ ត្រូវ​បង្ខំចិត្ត​បន្ត​ជន្លៀស​អ្នកទោស​ ៧៧៩​នាក់​ទៀត​ ដើម្បី​រក​ទី​សុវត្ថិភាព​

​បន្ទាយ​មាន​ជ័យ:​ យោងតាមផេកអគ្គស្នងការដ្ឋាននគរបាលជាតិបានឲ្យដឹងថា ថ្ងៃ​ទី​១៤​ខែតុលា​ ឆ្នាំ​ ២០២០​ ដោយសារ​ទឹកជំនន់​លិច​ពន្ធនាគារ​ខេត្តបន្ទាយមានជ័យ​ មាន​អ្នក​ជាប់​ឃុំ​ដែល​ត្រូវ​ជម្លៀស​ចេញពី​ពន្ធនាគារ​ ទៅ​ដាក់​នៅ​ពន្ធនាគារ​ខេត្ត​ចំនួន​០៣​ខេត្ត​ ក្នុង​នោះ​ ខេត្តកំពង់ធំ​,​ខេត្តឧត្តរមានជ័យ​ និង​ខេត្ត​ត្បូងឃ្មុំ​ ដែល​មាន​អ្នក​ជាប់​ឃុំ​ចំនួន​៧៧៩​នាក់​ ដោយ​ប្រើប្រាស់​កំ​កម្លាំង​អង្គភាព​អន្តរាគមន៍​ កម្លាំង​នាយកដ្ឋាន​សណ្តាបធ្នាប់​ របស់​អគ្គស្នងការដ្ឋាន​នគរបាល​ជាតិ​ កម្លាំង​នគរបាល​ខេត្ត​ កម្លាំង​អគ្គនាយកដ្ឋាន​ពន្ធនាគារ​ និង​អនុរក្ស​ពន្ធនាគារ​ខេត្ត​ និង​កងរាជអាវុធហត្ថ​ខេត្ត​ ដើម្បី​ធានា​បាន​សុវត្ថិភាព​ ។​

​ ​លោក​ឧត្តមសេនីយ៍ទោ​ អ៊ុ​ង​ ស៊ី​ផា​ន​ ប្រធាន​ពន្ធនាគារ​ខេត្តបន្ទាយមានជ័យ​ បាន​ឲ្យ​ដឹង​នៅ​ថ្ងៃ​ទី​១៤​ខែតុលា​ឆ្នាំ​២០២០​នេះ​ថា​៖​ ដោយសារ​កត្តា​នៃ​ល្បឿន​ទឹក​ឡើង​ជន់​លិច​យ៉ាង​គំហុក​តាំងពី​ថ្ងៃ​ទី​១៣​ខែតុលា​ឆ្នាំ​២០២០​ម្សិលមិញ​នេះ​ យើង​បាន​ប្រើប្រាស់​នូវ​វិធានការ​សរុប​ មធ្យោបាយ​សរុប​ និង​កម្លាំង​សរុប​ ត្រូវ​តែ​បង្ខំចិត្ត​ជម្លៀស​អ្នកទោស​ចេញពី​ពន្ធនាគារ​ខេត្ត​ទៅ​រក​ទី​សុវត្ថិភាព​នៅ​ខេត្ត​មួយ​ចំនួន​ ។​

លោក​ឧត្តមសេនីយ៍ទោ​បន្ត​ថា​ ជាក់ស្តែង​ដំណាក់កាល​ទី​០១​ គឺ​នៅ​ថ្ងៃ​ទី​១៣​ ខែតុលា​ម្សិលមិញ​ យើង​បាន​ជម្លៀស​ចេញ​អ្នក​ជាប់​ឃុំ​ចំនួន​៨១១​នាក់​ ក្នុង​នោះ​ស្រី​៨៥​នាក់​ និង​ កុមារ​នៅ​តាម​ ម្តាយ​ចំនួន​០៧​នាក់​ ទៅ​ ខេត្តសៀមរាប​ ហើយ​នៅ​ថ្ងៃ​ទី​១៤​ ខែតុលា​ ដោយ​ទឹកជំនន់​បន្ត​ជន់​លិច​បន្ថែម​ទៀត​ យើង​បន្ត​ជម្លៀស​អ្នក​ជាប់​ឃុំ​ ចំនួន​៧៧៩​នាក់​ ទៅ​រក​កន្លែង​សុវត្ថិភាព​ ក្នុង​នោះ​បញ្ជូន​ទៅ​ពន្ធនាគារ​ខេត្តឧត្តរមានជ័យ​ ចំនួន​២០០​ នាក់​,​ ខេត្តកំពង់ធំ​ ចំនួន​២០០​នាក់​ និង​បញ្ជូន​ទៅ​ពន្ធនាគារ​(​ម​៣​ ត្រពាំង​ផ្លុ​ង​)​ខេត្ត​ត្បូងឃ្មុំ​ ចំនួន​៣៧៩​នាក់​ ។​

​លោក​ប្រធាន​ពន្ធនាគារ​ខេត្ត​ បាន​បញ្ជាក់​ថា​៖​ ក្នុង​ការ​ជម្លៀស​ចេញ​នេះ​ គឺ​មានការ​យកចិត្តទុកដាក់​ពី​អគ្គស្នងការ​នគរបាល​ជាតិ​ អគ្គនាយកដ្ឋាន​ពន្ធនាគារ​ សហការ​ការពារ​សន្តិសុខ​ សុវត្ថិភាព​ ក្នុង​ការ​ដឹក​ជញ្ជូន​អ្នក​ជាប់​ឃុំ​ ទៅ​ដល់​គោលដៅ​នីមួយៗ​ ដូច​មាន​កម្លាំង​អង្គភាព​ អន្តរាគមន៍​ កម្លាំង​នាយកដ្ឋាន​ សណ្តាបធ្នាប់​ របស់​អគ្គស្នងការដ្ឋាន​នគរបាល​ជាតិ​ ,​ កម្លាំង​អគ្គនាយកដ្ឋាន​ពន្ធនាគារ​ ក្រសួងមហាផ្ទៃ​ ,​កម្លាំង​នគរបាល​ខេត្ត​និង​កងរាជអាវុធហត្ថ​ខេត្ត​ផង​ដែរ​ ៕

មតិយោបល់