ផ្ទះ ព័ត៌មានជាតិ គួរឲ្យអាសូរ! ...

គួរឲ្យអាសូរ! បុរស​វ័យ​ចំណាស់​ម្នាក់ ​អុំទូក​​ទៅ​ច្រូតស្មៅ​ឲ្យ​គោ​ស៊ី​ ស្រាប់តែពលរដ្ឋប្រទះឃើញ​សាកសព នៅក្បែរទូក

0

​បន្ទាយ​មាន​ជ័យ: យោងតាមផេក អគ្គស្នងការដ្ឋាននគរបាលជាតិ​​ បានឲ្យដឹងថា សាកសព​បុរស​វ័យ​ចំណាស់​ម្នាក់​ត្រូវ​បាន​គេ​ប្រទះ​ឃើញ​នៅ​ក្បែរ​ទូក​របស់​ខ្លួន​មិនដឹង​មូលហេតុ​ នៅ​ចំណុច​អាង​ កណ្តោល​ ស្ថិត​ក្នុងភូមិ​ទឹកថ្លា​ សង្កាត់​ទឹកថ្លា​ ក្រុង​សិរី​សោភ័ណ​ ខេត្តបន្ទាយមានជ័យ​ វេលា​ម៉ោង​១២​និង​៥០​នាទី​ថ្ងៃត្រង់​ ថ្ងៃ​ទី​២៨ ​ខែតុលា ​ឆ្នាំ​២០២០​ ។​

​ប្រភព​ព័ត៌មាន​ពី​នគរបាល​មូលដ្ឋាន​ ​បាន​ឲ្យ​ដឹង​ថា​ ជន​រង​គ្រោះ​មានឈ្មោះ​ រឿង​ ពន្លក​ ភេទ​ប្រុស​ អាយុ​ ៦៤​ឆ្នាំ​ មាន​ទីលំនៅ​ភូមិ​ទំនប់​ជ្រៃ​ សង្កាត់​ទឹកថ្លា​ ក្រុង​សិរី​សោភ័ណ​ ខេត្តបន្ទាយមានជ័យ​ ។​ នៅ​មុន​ពេល​កើតហេតុ​ជន​រង​គ្រោះ​បាន​អុំទូក​ម្នាក់ឯង​ទៅ​ច្រូតស្មៅ​ឲ្យ​គោ​ស៊ី​ នៅ​ចំណុច​អាង​កណ្តោល​ ស្ថិត​ក្នុងភូមិ​ទឹកថ្លា​ សង្កាត់​ទឹកថ្លា​ ក្រុង​សិរី​សោភ័ណ​ ។​

​ប្រភព​ដដែល​បាន​បញ្ជាក់​ថា​ តាម​សំដី​របស់​ប្រជាពលរដ្ឋ​នៅ​អាង​កណ្តោល​ ក៏​ដូច​ជា​ប្រជាពលរដ្ឋ​ឈ្មោះ​ អឿ​ន​ កំ​សត់​ ភេទ​ប្រុស ​អាយុ​៣៨​ឆ្នាំ​ ជា​កសិករ​ បាន​និយាយ​រៀបរាប់​ថា​ មុន​ពេល​ជន​រង​គ្រោះ​ស្លាប់​ពួក​គាត់​បានឃើញ​ជន​រង​គ្រោះ​កំពុង​ច្រូតស្មៅ​ម្នាក់ឯង​នៅ​ក្នុង​អាង​ លុះ​រយ:ពេល​០១​ម៉ោង​ក្រោយ​ក៏​ស្រាប់តែ​បាត់​គាត់​ ។​
ដោយ​មានការ​សង្ស័យ​ឈ្មោះ​ អឿ​ន​ កម្សត់​ ដែល​រាយ​សន្ទូច​នៅ​ក្បែរ​នោះ​ ក៏​ស្រែកហៅ​មិត្ត​ភ័ក្តិ​ម្នាក់​ទៀត​ដើរទៅ​មើល​ក៏​ឃើញ​ជន​រង​គ្រោះ​ឈរ​ស្លាប់​ទ្រោប​ជាប់​នឹង​ស្មៅ​ក្បែរ​ទូក​ បន្ទាប់​មក​ក៏​នាំ​គ្នា​លើកសព​ដាក់​លើ​ទូក​យក​សព​មក​លើគោក​ ។​

​នគរបាល​បាន​សន្និដ្ឋាន​ថា​ ជន​រង​គ្រោះជា​មនុស្ស​មាន​វ័យ​ចំណាស់​ ដូច្នេះ​អាច​គាត់​ធ្វើការ​ហួស​ កម្លាំង​ខ្យ​ល់​គ​ បណ្តាល​ឲ្យ​លង់ទឹក​ស្លាប់​ ។​សព​ត្រូវ​បាន​ប្រគល់​ជូន​ក្រុម​គ្រួសារ​យក​ទៅ​ចាត់ចែង​ធ្វើ​តាម​ប្រពៃណី​ ។​

​គួរ​បញ្ជាក់​ជូន​ថា​ នៅ​ខេត្តបន្ទាយមានជ័យ​ ក្នុង​រយ:ពេល​នៃ​ទឹកជំនន់​មក​ទល់​នឹង​ថ្ងៃ​ទី​២៧​ ខែតុលា​ ឆ្នាំ​២០២០​ បើ​យោង​តាម​របាយការណ៍​របស់​សាលាខេត្ត​បាន​បង្ហាញ​ថា​ មាន​ប្រជាពលរដ្ឋ​លង់ទឹក​ស្លាប់​ ចំនួន​២៦​នាក់​ ។​ បើ​គិត​មក​ទល់​នឹង​ថ្ងៃ​ទី​២៨ ​ខែតុលា ​ឆ្នាំ​២០២០​ កើន​ម្នាក់​ទៀត​ឡើង​ដល់​ចំនួន​២៧​នាក់​ ដែល​ក្នុង​នោះ​ ក្រុង​សិរី​សោភ័ណ​ ០៤​នាក់​,​ ក្រុង​ប៉ោយ​ប៉ែ​ត​ ចំនួន​០៤​នាក់​,​ស្រុក​អូរ​ជ្រៅ​ចំនួន​០២​នាក់​,​ ស្រុក​ស្វាយចេក​ ចំនួន​០៣​នាក់​,​ ស្រុក​ព្រះនេត្រព្រះ​ ចំនួន​០៣​នាក់​,​ ស្រុក​ថ្មពួក​ចំនួន​០៣​នាក់​,​ ស្រុក​ភ្នំស្រុក​០១​នាក់​,​ ស្រុក​មង្គល​បូ​រី​០៣​នាក់​ និង​ស្រុក​ម៉ា​ឡៃ​ ចំនួន​០៤​នាក់​ សរុប​ត្រឹម​ថ្ងៃ​ទី​២៨ ​ខែតុលា​ ឆ្នាំ​២០២០​ មាន​ចំនួន​២៧​នាក់​ ៕

មតិយោបល់