តាកែវៈ នៅថ្ងៃសៅរ៍​ ១៥កើត ខែកត្តិក ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី៣១ ខែតុលា ឆ្នាំ២០២០​ វេលាម៉ោង១៦និង៣០នាទី​​ មានករណីគ្រោះថ្នាក់ចរាចរណ៍ មួយកើតឡើង រវាងរថយន្តបើកលើផ្លូវធំ និងកង់ជិះចេញពីផ្លូវតូច​ នៅលើផ្លូវខេត្ត1TK1 ចន្លោះគីឡូម៉ែត្រលេខ ២១.២២ ស្ថិតក្នុងភូមិកំពង់ពោធិ៍ ឃុំព្រែកផ្ទោល ស្រុកអង្គរបូរី ខេត្តតាកែវ ។

ករណីគ្រោះថ្នាក់ចរាចរណ៍ខាងលើនេះ មានរថយន្ត ម៉ាក Tacoma ពណ៌ ទឹកប្រាក់ ពាក់ផ្លាកលេខ ភ្នំពេញ 2BD2262 មានទិសដៅពីកើតទៅលិច បើកបរដោយឈ្មោះ ម៉ិល រដ្ឋា ភេទប្រុស អាយុ៣០ឆ្នាំ​ មុខរបរ កសិករ មានទីលំនៅភូមិព្រៃផ្គាំ(គ)​ ឃុំព្រៃផ្គាំ ស្រុកអង្គរបូរី ខេត្តតាកែវ គ្មានរបួស។ ចំណែកជនរងគ្រោះជិះកង់ ពណ៌ស ជិះចេញពីផ្លូវតូច មានទិសដៅពីជើងទៅត្បូង បានជិះដោយឈ្មោះ និល សុខចិន ភេទប្រុស អាយុ១១ឆ្នាំ មុខរបរសិស្ស មានទីលំនៅភូមិ-ឃុំកើតហេតុខាងលើ របួសធ្ងន់ (បាក់កជើងខាងឆ្វេង) បានក្រុមគ្រួសារបញ្ជូនជនរងគ្រោះទៅព្យាបាលនៅមន្ទីរពេទ្យគន្ធបុប្ផា ភ្នំពេញ។

មូលហេតុ៖ បើកបរមិនគោរពសិទ្ធិអាទិភាព។

ក្រោយកើតហេតុសមត្ថកិច្ចបានចុះទៅវាស់វែងយកវត្ថុតាងទាំង ០២គ្រឿង ទៅរក្សាទុកនៅអធិការដ្ឋាននគរបាលស្រុក ដើម្បីកសាងសំណុំរឿងតាមនីតិវិធី៕