ភ្នំពេញ: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា កម្លាំងនគរបាលព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញ កំពុងបន្តស្រាវជ្រាវស្វែងរកចាប់ខ្លួនជនសង្ស័យនៅសេសសល់ក្នុងសកម្មភាពអំពើប្លន់ម៉ូតូនៅខណ្ឌពោធិ៍សែន ០៩នាក់ទៀត បន្ទាប់ពីជនសង្ស័យ០២នាក់ត្រូវបានកម្លាំងនគរបាលព្រហ្មទណ្ឌចាប់ខ្លួនបាន ខណ:ពួកគេរត់គេចទៅដល់ខេត្តកំពត ។
ជនសង្ស័យ០២នាក់នោះត្រូវបានកម្លាំងនគរបាលការិយាល័យជំនាញនៅថ្ងៃទី១៥ ខែវិច្ឆិកា ឆ្នាំ២០២០ កសាងសំណុំរឿងចាប់បញ្ជូនទៅតុលាការចាត់ការតាមផ្លូវច្បាប់រួចហើយ ក្រោយពីបង្ក្រាបចាប់ឃាត់ខ្លួនកាលពីថ្ងៃទី១១ ខែវិច្ឆិកា កន្លងទៅនេះស្ថិតនៅកន្លែងកម្សាន្តមួយកន្លែងទំនប់ប្រទាក់ក្រឡា ភូមិកូនសត្វ ឃុំកូនសត្វ ស្រុកទឹកឈូ ខេត្តកំពត។
បើយោងតាមរបាយការណ៍របស់ការិយាល័យនគរបាលព្រហ្មទណ្ឌកម្រិតស្រាលឱ្យដឹងថា ជនសង្ស័យទាំង ០២នាក់មានឈ្មោះ ចាន់ ថន ភេទប្រុស អាយុ ១៧ឆ្នាំ និងឈ្មោះ អៀ គីមស្រ៊ន ភេទប្រុស អាយុ ១៨ឆ្នាំ និងដកហូតវត្ថុតាងម៉ូតូដែលធ្វើសកម្មភាពប្លន់ចំនួន ០២គ្រឿង ។
សូមរំលឹកថា កាលពីយប់ថ្ងៃទី០៨ ខែវិច្ឆិកា ឆ្នាំ២០២០ មានក្រុមយុវជន០១ក្រុមមានគ្នា១១នាក់ជិះម៉ូតូ០៥គ្រឿងបានធ្វើសកម្មភាពយកដុំថ្មគប់ទៅលើក្រុមយុវជនមួយក្រុមទៀតមានគ្នាប្រមាណ០៧នាក់ ចតម៉ូតូចោលកំពុងអង្គុយលេងខាងមុខម៉ាត PM ផ្លូវលេខ២០០៤ ភូមិត្រពាំងល្វា២ សង្កាត់កាកាប១ ខណ្ឌពោធិ៍សែនជ័យ ។ នៅពេលនោះក្រុមយុវជនរងគ្រោះក៏បានរត់ចោលម៉ូតូ ហើយត្រូវបានបក្ខពួកក្រុមជនសង្ស័យប្លន់យកម៉ូតូ០១គ្រឿងរបស់ក្រុមយុវជនរងគ្រោះម៉ាកសេ១២៥ ពណ៌ខ្មៅ ស៊េរីឆ្នាំ២០២០ ជិះគេចខ្លួនបាត់។
របាយការណ៍ដដែលឱ្យដឹងទៀតថា អំពើប្លន់ម៉ូតូខាងលើមុនដំបូងផ្តើមចេញរវាងក្រុមជនរងគ្រោះ និងក្រុមជនសង្ស័យជិះម៉ូតូមើលមុខគ្នាទៅវិញទៅមក ។ បន្ទាប់មក ក្រុមជនសង្ស័យបានជិះម៉ូតូដេញតាមឃើញក្រុមជនរងគ្រោះអង្គុយខាងមុខម៉ាតក៏យកដុំថ្មគប់ក្រុមជនរងគ្រោះ ហើយប្លន់យកម៉ូតូ០១គ្រឿងគេចបាត់ ។
មុខសញ្ញាជនសង្ស័យដែលនៅសេសសល់កំពុងរត់គេចខ្លួន ត្រូវបានសមត្ថកិច្ចកំណត់បានរួចនោះហើយ និងបន្តស្វែងរកចាប់ខ្លួនដើម្បីយកមកផ្តន្ទាទោសតាមផ្លូវច្បាប់ ៕
មតិយោបល់