កោះកុងៈ នៅថ្ងៃទី១៦ ខែវិច្ឆិកា ឆ្នាំ២០២០ វេលាម៉ោង១០និង២៥នាទីព្រឹក ដោយអនុវត្តតាមអនុសាសន៍ណែនាំរបស់លោកឧត្តមសេនីយ៍ស្នងការនគរបាលខេត្តកោះកុង
លោកវរសេនីយ៍ឯក ហួន នុន អធិការនគរបាលស្រុកស្រែអំបិល បានដឹកនាំកម្លាំងជំនាញប្រឆាំងគ្រឿងញៀន, ផ្នែកព្រហ្មទណ្ឌ, ប៉ុស្តិ៍រដ្ឋបាលស្រែអំបិល និងកម្លាំងអន្តរាគមន៍ បានចុះអនុវត្តន៍តាមដីកាបង្គាប់ឲ្យចាប់ខ្លួនរបស់សាលាដំបូងខេត្តកោះកុងលេខ :៣៦២៦ត.ព/១៩ ចុះថ្ងៃទី៣១/១២/១៩ ចេញដោយ ងួន ធីរ: ចៅក្រមស៊ើបសួរសាលាតំបូងខេត្តកោះកុង ។

បង្គាប់ឲ្យចាប់ខ្លួនជនសង្ស័យឈ្មោះ ផន ចិត្រា ភេទប្រុស អាយុ៣២ឆ្នាំ ជនជាតិខ្មែរ ទីលំនៅបច្ចុប្បន្នភូមិ-ឃុំស្រែអំបិល ស្រុកស្រែអំបិល ខេត្តកោះកុង ពីបទជួញដូរចែកចាយនូវសារធាតុញៀនដោយខុសច្បាប់ នៅចំណុចរង្វង់មូលស្រែអំបិល ភូមិត្រពាំង ឃុំស្រែអំបិល ស្រុកស្រែអំបិល ។

ក្រោយពេលឆែកឆេរ កម្លាំងបានរកឃើញម្សៅក្រាមពណ៌សថ្លាសង្ស័យថាជាសារធាតុញៀនចំនួន ១កញ្ចប់តូច ជញ្ជើងថ្លឹងថ្នាំពណ៌ខ្មៅចំនួន១គ្រឿង អាវុធAK ៤៧ ចាស់ ១ដើម គ្រាប់១៦គ្រាប់ (ក្នុងនោះគ្រាប់អឹមសីចំនួន ២គ្រាប់) និងអាវុធកែឆ្នៃ ចំនួន២ដើមថែមទៀត។

ចំពោះអាវុធ៣ដើមខាងលើ កម្លាំងជំនាញប្រឆាំងគ្រឿងញៀន បានប្រគល់ឲ្យ ទៅផ្នែកព្រហ្មទណ្ឌដើម្បីកសាងសំណុំរឿងបន្ថែម ។ ជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកស្រែអំបិលដើម្បីកសាងសំណុំរឿង បញ្ជូនទៅតុលាការខេត្តកោះកុង ដើម្បីចាត់ការបន្ត៕