ព័ត៌មានជាតិ

មន្ត្រី​បម្រើការងារនៅសាលា​ខេត្តបន្ទាយមានជ័យ​ម្នាក់​ ​ជិះម៉ូតូ​បុក​រថយន្ត​ដឹកស្រូវ​ឈប់​ចត​ស្ងៀម បណ្តាលឲ្យរងរបួសធ្ងន់​

​បន្ទាយ​មាន​ជ័យ:​ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា យុវជន​ម្នាក់​ ដែល​គេ​ស្គាល់​ជា​មន្ត្រី​បំរើ​ការងារ​នៅ​សាលា​ខេត្តបន្ទាយមានជ័យ​ បាន​រងគ្រោះថ្នាក់​ចរាចរណ៍​រង​របួសធ្ងន់​ ដោយ​បើក​ម៉ូតូ​បុក​រថយន្ត​ធុន​ធំ​ដឹកស្រូវ​ពីក្រោយ​។​ ហេតុការណ៍​បង្ក​ឲ្យ​មានការ​ភ្ញាក់ផ្អើល​នេះ​ បាន​កើតឡើង​នៅ​វេលា​ម៉ោង​៧​យប់​ ថ្ងៃ​ទី​២៣​ ​ខែវិច្ឆិកា​ ឆ្នាំ​២០២០​ នៅ​ចំណុច​ផ្លូវ​កោង​ក្នុងភូមិ​តា​គល់​ ឃុំ​ផ្គាំ​ ស្រុក​ស្វាយចេក​ ខេត្តបន្ទាយមានជ័យ​ ។​

​តាម​ប្រភព​ព័ត៌មាន​ពី​នគរបាល​មូលដ្ឋាន​ បាន​ឲ្យ​ដឹង​ថា​ ជន​រង​គ្រោះ​អ្នកបើកបរ​ម៉ូតូ​ឈ្មោះ​ វ៉ៃ​ វិ​ន​ ភេទ​ប្រុស​ អាយុ​២៩​ឆ្នាំ​ (​មិន​ពាក់មួក​សុវត្ថិភាព​)​ រស់នៅ​ភូមិ​ផ្គាំ​ ឃុំ​ផ្គាំ​ ស្រុក​ស្វាយចេក​ ខេត្តបន្ទាយមានជ័យ​ ជា​មន្ត្រី​បំរើ​ការងារ​នៅ​សាលា​ខេត្តបន្ទាយមានជ័យ​ ។​

​ប្រភព​ដដែល​បាន​បញ្ជាក់​ថា​ មុន​ពេល​កើតហេតុ​ជន​រង​គ្រោះ​បាន​បើក​ម៉ូតូ​ម៉ាក​ហុងដា​ឃ្លី​ក​ ពណ៌​ខ្មៅ​ ពាក់ផ្លាក​លេខ​ ប​.​មាន​ជ័យ​.1U-2160​ ក្នុង​ទិស​ដៅ​ពី​ត្បូង​ទៅ​ជើង​ ដល់​ចំណុច​កើតហេតុ​ចំណុច​ផ្លូវ​កោង​ក្នុងភូមិ​តា​គល់​ ឃុំ​ផ្គាំ​ ស្រុក​ស្វាយចេក​ បាន​បុក​រថយន្ត​ធុន​ធំ​ដឹកស្រូវ​ម៉ាក​ HINO​ ស្លាក​លេខ​ ពោធិ៍សាត់​ 3A-0634​ ដែល​ឈប់​ចត​គ្មាន​ដាក់​ស្លាក​សញ្ញា​សម្គាល់​បំរុង​លើក​ការុង​ស្រូវ​ដាក់​លើ​រថយន្ត​ បណ្តាល​ឲ្យ​រង​របួសធ្ងន់​ ភ្លាមៗ​នោះ​ ត្រូវ​បាន​សាច់ញាតិ​ដឹក​ទៅ​សង្គ្រោះ​នៅ​មន្ទីរពេទ្យ​បង្អែក​មិត្តភាព​កម្ពុជា​-​ជប៉ុន​ នៅ​ស្រុក​មង្គល​បូ​រី​ ចំណែក​អ្នកបើកបរ​រថយន្ត​ក្រោយ​កើតហេតុ​ បាន​រត់គេច​ខ្លួន​បាត់​ ។​

​វត្ថុ​តាង​ម៉ូតូ​និង​រថយន្ត​ សមត្ថកិច្ច​នគរបាល​ជំនាញ​ យក​ទៅ​រក្សា​ទុក​នៅ​អធិការដ្ឋាន​នគរបាល​ស្រុក​ស្វាយចេក​ ដើម្បី​រង់ចាំ​ធ្វើការ​ ដោះស្រាយ​នៅ​ពេល​ក្រោយ​។​ មូលហេតុ​បង្ក​ឲ្យ​កើត​មាន​គ្រោះថ្នាក់​ចរាចរណ៍​នេះ​ បណ្តាល​មក​ពី​អ្នក​បើក​ បររថ​យន្ត​ឈប់​ចត​លើ​ទ្រូងផ្លូវ​ខាងឆ្វេង​ដៃ​ជា​ចំណុច​ផ្លូវ​កោង​និង​មិន​មាន​ដាក់​ស្លាក​សញ្ញា​សម្គាល់​ ៕

មតិយោបល់