ផ្ទះ ព័ត៌មានជាតិ ក្មេង​ប្រុស​ស...

ក្មេង​ប្រុស​ស្រី​សុំ​ម្តាយ​លេង​ទឹក​ បាត់​មិនឃើញ​មក​វិញ​ នាំ​គ្នា​ចុះ​រាវរក​​ឃើញលង់​ស្លាប់​ទាំង​ ២​នាក់​

0

​បន្ទាយ​មាន​ជ័យ: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា ក្មេង​ប្រុស​-​ស្រី​ចំនួន​០២​នាក់​ អាយុ​ ៥​ឆ្នាំ​ និង​ម្នាក់​ទៀត​អាយុ​ ៦​ឆ្នាំ​ បាន​លង់ទឹក​អូរ​ធំ​ស្លាប់​ បន្ទាប់​ពី​សុំ​ម្តាយ​ទៅ​មុជទឹក​លេង​ ។​

​ហេតុការណ៍​ដ៏​គួរ​ឲ្យ​រន្ធត់​នេះ​បាន​កើតឡើង​នៅ​វេលា​ម៉ោង ​១២​ថ្ងៃត្រង់​ ថ្ងៃ​ទី​២២​ ខែធ្នូ​ ឆ្នាំ​២០២០​ នៅ​ចំណុច​ក្លង​ជិ​ក​(​អូរ​ធំ​)​ ស្ថិត​ក្នុងភូមិ​រស្មី​សាមគ្គី​ សង្កាត់​និមិត្ត​ ក្រុង​ប៉ោយ​ប៉ែ​ត​ ខេត្តបន្ទាយមានជ័យ​ ។​

តាម​ប្រភព​ព័ត៌មាន​ពី​នគរបាល​មូលដ្ឋាន​ បាន​ឲ្យ​ដឹង​ថា​៖​ ក្មេង​រង​គ្រោះ​ទាំង​០២​នាក់​ ម្នាក់​ឈ្មោះ​ ម៉ៅ​ ដាវ​ ភេទ​ប្រុស​ អាយុ​០៥​ឆ្នាំ​ និង​ម្នាក់​ទៀត​ឈ្មោះ​ វ៉ង់​ វិ​ដា​ ភេទ​ស្រី​ អាយុ​០៦​ឆ្នាំ​ ។​ ក្មេង​ទាំង​០២​នាក់​ ជា​បងប្អូន​ជីដូនមួយ​និង​គ្នា​ រស់នៅ​ភូមិ​រស្មី​សាមគ្គី​ សង្កាត់​និមិត្ត​ ក្រុង​ប៉ោយ​ប៉ែ​ត​ ខេត្តបន្ទាយមានជ័យ​ ។​

​ប្រភព​ដដែល​បាន​បញ្ជាក់​ថា​៖​បើ​តាម​ការ​រៀបរាប់​របស់​ស្ត្រី​ឈ្មោះ​ ជុំ​ ស្រី​ថា​ អាយុ​ ៣៦​ឆ្នាំ​ ត្រូវជា​ ម្តាយ​ក្មេង​ស្រី​រង​គ្រោះ​ បាន​ប្រាប់​សមត្ថកិច្ច​ថា​ នៅ​មុន​ពេល​កើតហេតុ​ កូន​របស់​គាត់​ឈ្មោះ​ វ៉ង់​ វិ​ដា​ បាន​អោប​ថើប​សុំ​ម្តាយ​ទៅ​ចុះ​ងូតទឹក​០២​នាក់​បងប្អូន​ ដោយ​ក្តី​អាណិតកូន​ដែល​ពី​មុនៗ​មក​មិន​មាន​សកម្មភាព​អោប​ថើប​ម្តាយ​ដោយ​ក្តី​លួងលោម​ដូច្នេះ​ ខ្លួន​ក៏​យល់ព្រម​ឲ្យ​ងូត​ចុះ​ងូតទឹក​លេង​ ។​ មួយសន្ទុះ​ក្រោយមក​ ឃើញ​ក្មេង​រង​គ្រោះ​ទាំង​០២​នាក់​ បាន​ឡើង​មក​វិញ​ហើយ​ រួច​ចូល​ងូតទឹក​អាង​នៅ​ក្នុងផ្ទះ​ ។​ ដោយ​នឹកឃើញ​ថា​ ក្មេង​ទាំង​០២​នាក់​បងប្អូន​លឺ​មាត់​នៅ​អាង​ទឹក​ក្នុងផ្ទះ​គាត់​មិន​បាន​ចាប់អារម្មណ៍​ បន្ត​កាប់​ឆ្ការ​ស្មៅ​ដុះ​នៅ​ក្បែរ​ផ្ទះ​ ។​ លុះ​មួយស្របក់​ក្រោយមក​ ស្រាប់តែ​បាត់​មាត់​ គាត់​ដើរទៅ​រក​នៅ​នឹង​អាង​មិនឃើញ​ ហើយ​បាន​ឲ្យ​ជីដូន​ដើរទៅ​រក​មើល​នៅ​កន្លែង​លក់​នំ​ក៏​មិនឃើញ​ទៀត​ ពេល​នោះ​ឃើញ​ខោអាវ​នៅ​មាត់​អូរ​ គាត់​បាន​ចុះ​រាវ​មើល​ ស្រាប់តែ​ប្រទះ​ឃើញ​កូនស្រី​របស់​គាត់​ឈ្មោះ​ វ៉ង់​ វិ​ដា​ បន្ទាប់​មក​រាវរក​ឃើញ​ក្មួយ​ប្រុស​ម្នាក់​ទៀត​ ។​

​ ​នគរបាល​មូលដ្ឋាន​បាន​បញ្ជាក់​ថា​៖ ​ក្រោយ​ពី​រាវរក​ឃើញ​ក្មេង​ទាំង​០២​នាក់​ហើយ​ ឪពុក​ម្តាយ​បាន​នាំ​កូន​ទៅ​មណ្ឌល​សុខភាព​សង្កាត់​ គ្រូពេទ្យ​បាន​និយាយ​ថា​ក្មេង​ទាំង​០២​នាក់​បាន​ស្លាប់​ហើយ​ ។​ ដោយ​មិន​អស់ចិត្ត​ឪពុក​ម្តាយ​បាន​បន្ត​យក​ក្មេង​ទាំង​០២​នាក់​ទ​មន្ទីរពេទ្យ​បង្អែក​ ក្រុង​ប៉ោយ​ប៉ែ​ត​ទៀត​ គ្រូពេទ្យ​បាន​ប្រាប់​ថា​ ក្មេង​ទាំង​០២​នាក់​បាន​បាត់បង់​ជីវិត​ ហើយ​ទើប​អស់ចិត្ត​យក​កូន​មក​រៀបចំ​ធ្វើបុណ្យ​តាម​ប្រពៃណី​ ៕

មតិយោបល់