សៀមរាបៈ នៅវេលាម៉ោង១១និង៣២នាទីថ្ងៃទី២៦ ខែធ្នូ ឆ្នាំ២០២០ មានករណីគ្រោះថ្នាក់ចរាចរណ៍មួយកើតឡើង យវយជនម្នាក់ ជិះម៉ូតូលឿន បុកសត្វឆ្កែ បណ្តាលឲ្យដួលបោកនឹងខឿនផ្លូវ ស្លាប់នៅកន្លែងកើតហេតុ នៅត្រង់ចំណុចរង្វង់មូលផ្លូវ៦០ម៉ែត្រ ស្ថិតក្នុងភូមិអញ្ចាញ សង្កាត់ស្លក្រាម ក្រុងសៀមរាប ខេត្តសៀមរាប ។

ហេតុការណ៍គ្រោះថ្នាក់ចរាចរណ៍ខាងលើនេះ គេឃើញយុវជនម្នាក់ ជិះម៉ូតូ១គ្រឿងម៉ាក WAVE ពាក់ផ្លាកលេខ សៀមរាប 1P6485 បើកបរក្នុងល្បឿនយ៉ាងលឿន លុះមកដល់ចំណុចកើតហេតុ ដោយខ្វះការប្រុងប្រយ័ត្ន បានបុកសត្វឆ្កែមួយក្បាលរត់កាត់ផ្លូវ បណ្តាលឲ្យដួលបោកនឹងខឿនផ្លូវ ស្លាប់នៅកន្លែងកើតហេតុ ។

សពជនរងគ្រោះឈ្មោះ សុន សី ភេទប្រុស អាយុ១៨ឆ្នាំ មានទីលំនៅ ឃុំស្វាយលើ ស្រុកស្វាយលើ ខេត្តសៀមរាប ។ ជនរងគ្រោះជាកូនកំព្រាធ្លាប់បួសជាសង្ឃគង់នៅវត្តប្រាសាទត្រាំនាគ ។

មូលហេតុ៖ បណ្តាលមកពីជនរងគ្រោះ បើកបរក្នុងល្បឿនយ៉ាងលឿន និងខ្វះការប្រុងប្រយ័ត្នផងនោះ លុះមកដល់ចំណុចកើតហេតុ បុកសត្វឆ្កែមួយក្បាលបណ្តាលឲ្យដួលបោកខឿនផ្លូវស្លាប់ ។

ក្រោយពេលកើតហេតុ សមត្ថកិច្ចមូលដ្ឋានបានចុះទៅពិតនិត្យ ដល់ទីតាំងខាងលើ ធ្វើការវាស់វែង កត់កំណត់ហេតុ ប្រគល់សាកសពជនរងគ្រោះ ទៅព្រះគ្រូចៅអធិការវត្តប្រាសាទត្រាំនាគ រៀបចំធ្វើបុណ្យតាមប្រពៃណី៕