បន្ទាយមានជ័យៈ បុរសម្នាក់បានវាយនារីជាអ្នកលក់ដូរម្នាក់ស្ទើរស្លាប់ស្ទើរ ដោយសារតែរឿងទិញបារីជឿមិនបាន។ ករណីនេះ បានកើតឡើងកាលពីយប់ថ្ងៃទី១០ ខែតុលា ឆ្នាំ២០១៦ចំណុចភូមិគីឡូម៉ែត្រលេខ៤ ស្ថិតក្នុងសង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។

លោកវរសេនីយ៍ត្រី ជា ដា មេបញ្ជាការមូលដ្ឋានអាវុធហត្ថក្រុងប៉ោយប៉ែតប្រាប់ថា រឿងនេះ គឺផ្តើមចេញពីការសុំទិញបារីជឿសិន តែអ្នកលក់មិនព្រមឲ្យជឿ ដោយអះអាងថា ជឿមិនដែលសងទេ។ លោកបានឲ្យដឹងទៀតថា ជនបង្កមានឈ្មោះ ណន ភាឡែន ប្រុស អាយុ៣២ឆ្នាំ រស់នៅក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត រីឯស្ត្រីរងគ្រោះមានឈ្មោះ ជឿត ម៉ារីន អាយុ២៥ឆ្នាំ រស់នៅចំណុចកើតហេតុខាងលើ។

លោកបានបន្តទៀតថា ក្រោយពីស្ត្រីរងគ្រោះបានបដិសេធមិនព្រមឲ្យជឿ ស្រាប់តែបុរសជាជនដៃដល់បានស្រែកសំឡុត និងស្ទុះទៅក្របួចកអាវ ហើយវាយតប់ធ្វើឲ្យស្រ្តីអ្នកលក់ដួលបោកក្បាលទៅនឹងជញ្ជាំង បណ្តាលឲ្យបែកហូរឈាមរងរបួសធ្ងន់។

បច្ចុប្បន្នជនបង្ក ត្រូវបានមន្ត្រីជំនាញកងរាជអាវុធហត្ថខេត្តឃាត់ខ្លួន ដើម្បីកសាងសំនុំរឿងបញ្ជូនទៅកាន់សាលាដំបូងខេត្តបន្ទាយមានជ័យ ចាត់ការតាមនីតិវិធីច្បាប់៕