បង្កើត Facebook ក្លែងក្លាយដាក់រូបស្រីស្អាត ឆាតលួងលោមប្រុសៗ ដើម្បីបានវីដេអូ និងរូបភាពអាក្រាត គំរាមទារប្រាក់ ត្រូវសមត្ថកិច្ចចាប់ខ្លួនហើយ

ភ្នំពេញ: យោងតាមផេករបស់អគ្គនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ បានឲ្យដឹងថា បុរសម្នាក់ជំនាញបង្កើតគណនី Facebook ក្លែងក្លាយប្រើប្រាស់រូបភាពនារីស្អាតៗ ហើយឆាតលួងលោមបុរសៗ ដើម្បីបានវីដេអូ និងរូបភាពអាក្រាតកាយ រួចគំរាមបង្ហោះចែកចាយជាសាធារណ:ប្រសិនបើជនរងគ្រោះមិនផ្ដល់លុយតាមអ្វីដែលគេទាមទារនោះ ត្រូវបានកម្លាំងការិយាល័យនគរបាលព្រហ្មទណ្ឌកម្រិតធ្ងន់ នៃនាយកដ្ឋាននគរបាលព្រហ្មទណ្ឌ ចាប់ខ្លួនបាននៅរសៀលថ្ងៃទី២៨ ខែធ្នូ ឆ្នាំ២០២០នេះ ស្ថិតក្នុងភូមិទួលរកា១ សង្កាត់ចាក់អង្រែក្រោម ខណ្ឌមានជ័យ។

ប្រតិបត្តិការនេះ ធ្វើឡើងក្រោមការបញ្ជាផ្ទាល់ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ, ឧត្តមសេនីយ៍ឯក អ៉ិន បូរ៉ា អគ្គស្នងការរងនគរបាលជាតិ និងមានការចង្អុលបង្ហាញពី លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ។ ការចាប់ខ្លួននេះ គឺដឹកនាំផ្ទាល់ដោយលោកឧត្តមសេនីយ៍ទោ ជាវ វិបុល អនុប្រធាននាយកដ្ឋាននគរបាលព្រហ្មទណ្ឌ និងលោកវរសេនីយ៍ឯក ហែម បូណា នាយការិយាល័យនគរបាលព្រហ្មទណ្ឌកម្រិតធ្ងន់។

ជនសង្ស័យដែលកម្លាំងនគរបាលជំនាញចាប់ខ្លួនបាន ឈ្មោះ ម៉ាក់ ហាក់ចិត្រា អាយុ២៣ឆ្នាំ មានស្រុកកំណើតនៅភូមិផ្សារថ្មី ឃុំ១៣មករា ក្រុងបាត់ដំបង ខេត្តបាត់ដំបង។ ការចាប់ខ្លួននេះ នៅពេលដែលជនសង្ស័យកំពុងធ្វើដំណើរទៅដកប្រាក់ ក្រោយគំរាមទារបានសម្រេចពីបុរសជនរងគ្រោះម្នាក់ ដែលមានទីលំនៅក្នុងខណ្ឌទួលគោក។

ក្រោយចាប់ខ្លួនកម្លាំងជំនាញបានរកឃើញថា ក្នុងទូរស័ព្ទរបស់ជនសង្ស័យ មានសុទ្ធតែរូបភាព និងវីដេអូអាក្រាតរបស់បុរសៗជាច្រើន ដែលសុទ្ធតែអ្នកចាញ់បោកជនដៃ តាមរយ:ការលួងលោម និងផ្ញើរូបភាព ក៏ដូចជាវីដេអូរបស់នារីស្អាតដើម្បីឲ្យជនរងគ្រោះទន់ចិត្ត ហើយធ្វើអ្វីតាមការប្រាប់របស់ជនសង្ស័យ។ បច្ចុប្បន្នជនសង្ស័យកម្លាំងជំនាញ បានកសាងសំណុំរឿងដើម្បីចាត់ការបន្ដតាមនីតិវិធី។

តាមរយ:បទល្មើសលើកនេះ នាយកដ្ឋាននគរបាលព្រហ្មទណ្ឌ បានអំពាវនាវដល់អ្នកប្រើប្រាស់បណ្ដាញសង្គម Facebook ទាំងអស់ត្រូវបង្កើនការប្រុងប្រយ័ត្ន ជៀសវាងបាញ់បោកជនខិលខូចដែលប្រើប្រាស់រូបភាពបែបនេះ ឬស្រដៀងករណីនេះ ព្រោះករណីនេះមិនមែនទើបតែកើតមាននោះទេ៕

 

មតិយោបល់