ផ្ទះ ព័ត៌មានជាតិ ប្រុងប្រយ័ត្ន...

ប្រុងប្រយ័ត្នបងប្អូន! មន្រ្តីជំនាញរកឃើញ កាហ្វេ ទឹកដោះ ស្រាបៀរ សាប៊ូទឹក មីឡូ ទឹកស៊ីរ៉ូ ខូចគុណភាព និងហួសកាលបរិច្ឆេទប្រើប្រាស់

0

ព្រះវិហារ: យោងតាមផេកអគ្គ.ការពារអ្នកប្រើប្រាស់ កិច្ចប្រកួតប្រជែង និងបង្រ្កាបការក្លែងបន្លំបានឲ្យដឹងថា នៅថ្ងៃអង្គារ ៦កើត ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៩ ខែមករា ឆ្នាំ២០២១ មន្ត្រីសាខា ក.ប.ប. ខេត្តព្រះវិហារ ដោយទទួលបានការសហការពី មន្ត្រីមន្ទីរពាណិជ្ជកម្មខេត្ត និងអាជ្ញាធរដែនដី បានចុះផ្សព្វផ្សាយអំពីគុណភាព សុវត្ថិភាព ម្ហូបអាហារ និងធ្វើការត្រួតពិនិត្យទំនិញដែលជាគ្រឿងឧបភោគ បរិភោគ នៅតាមផ្ទះលក់ទំនិញ និងផ្សារ ក្នុងឃុំស្រយង់ ស្រុកគូលេន ខេត្តព្រះវិហារ ។ គោលដៅសំខាន់នៃការត្រួតពិនិត្យគឺដើម្បីស្រាវជ្រាវទប់ស្កាត់ការចរាចរណ៍ទំនិញខូចគុណភាព ក្លែងបន្លំស្លាកសញ្ញា ផុតកំណត់កាលបរិច្ឆេទប្រើប្រាស់ និងមានសារធាតុគីមីហាមឃាត់។

ក្នុងសកម្មភាពនេះ មន្ត្រីជំនាញបានធ្វើការវិភាគបឋមទៅលើគំរូម្ហូបអាហារ មួយចំនួន ដើម្បីស្វែងរកសារធាតុគីមីហាមឃាត់ ដែលអាចធ្វើឱ្យប៉ះពាល់ដល់សុខភាពប្រជាពលរដ្ឋ។ ជាមួយគ្នានោះ មន្ត្រីជំនាញក៏បានធ្វើការត្រួតពិនិត្យរកភាពមិនអនុលោមរបស់ទំនិញនៅលើសម្បកវេចខ្ចប់ផងដែរ។

ជាលទ្ធផល មន្ត្រីជំនាញបានរកឃើញ ទំនិញខូចគុណភាព និងហួសកាលបរិច្ឆេទប្រើប្រាស់ ចំនួន ៣៣.៣៨គីឡូក្រាម មានដូចជា៖
– ភេសជ្ជ:ដប ចំនួន ២៤ដប ស្មើនឹង ៨.៥០លីត្រ
– ភេសជ្ជ:កំប៉ុង ចំនួន ៩កំប៉ុង ស្មើនឹង ២.៩៧លីត្រ
– កាហ្វេ ចំនួន ១កញ្ចប់ ធំ ស្មើនឹង ១គីឡូក្រាម
– ទឹកដោះគោកញ្ចប់ ចំនួន ៨ កញ្ចប់ ស្មើនឹង ១.៦លីត្រ
– ស្រាបៀរ ចម្រុះ ចំនួន ៧កំប៉ុង ស្មើនឹង ២.៣១លីត្រ
– សាប៊ូទឹក ចំនួន ៦ដប ស្មើនឹង ២.៤០លីត្រ
– ទឹកដោះគោជូរ ចំនួន ២៤ដប ស្មើនឹង ៧.២០លីត្រ
– មីឡូ ចំនួន ៤ដប ស្មើនឹង ១.៦០លីត្រ
– ទឹកស៊ីរ៉ូ ចំនួន ៤ដប ស្មើនឹង ២.៨០លីត្រ
– មីចម្រុះ ចំនួន ៥០កញ្ចប់ ស្មើនឹង ៣គីឡូក្រាម។

បន្ទាប់មក មន្ត្រីសាខា ក.ប.ប. បានធ្វើកំណត់ហេតុដកហូត ទំនិញទាំងនោះយកទៅរក្សាទុក ដើម្បីធ្វើការដុតកម្ទេចចោលនៅពេលក្រោយ។ ទន្ទឹមនឹងនោះមន្ត្រីជំនាញក៏បានធ្វើការណែនាំដល់អាជីវករផ្សេងទៀត ឱ្យយល់ដឹង និងអនុវត្តទៅតាមច្បាប់ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ព្រមទាំងច្បាប់ស្តីពីកិច្ចការពារអ្នកប្រើប្រាស់ ជៀសវាងបង្កផលប៉ះពាល់ដល់សុខភាពប្រជាពលរដ្ឋ និងអាចប្រឈមចំពោះមុខច្បាប់ថែមទៀត៕

មតិយោបល់