​កណ្ដាលៈ យោងតាមផេក ការិយាល័យផ្សព្វផ្សាយតាមបណ្តាញសង្គម បានឲ្យដឹងថា នៅថ្ងៃអាទិត្យ១១កើត ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៤ ខែមករា ឆ្នាំ២០២១ វេលាម៉ោង៣និង៣០នាទី មានករណី​លង់ទឹកបណ្តាលឱ្យស្លាប់ នៅចំណុចទន្លេបាសាក់ ស្ថិតនៅក្នុងភូមិក្បាលកោះតូច ឃុំតាលន់ ស្រុកស្អាង ខេត្តកណ្តាល។

សពជនរងគ្រោះឈ្មោះ ហាប់ ប៊ី ភេទប្រុស អាយុ១០ឆ្នាំ ជនជាតិខ្មែរ មុខរបរសិស្ស ថ្នាក់ទី៣រៀន នៅសាលាបឋមសិក្សាក្បាលកោះតូច មានទីលំនៅភូមិក្បាលកោះតូច ឃុំតាលន់ ស្រុកស្អាង ខេត្តកណ្តាល ។ ឪពុកឈ្មោះ យុន ហាប់ ភេទប្រុស អាយុ៤៣ឆ្នាំ ជនជាតិខ្មែរមុខរបរ លក់ដូរ នៅភ្នំពេញ ។ ម្តាយឈ្មោះ ជ្រាវ ម៉ុម ភេទស្រី អាយុ៣៣ឆ្នាំ ជនជាតិខ្មែរ មុខរបរលក់ដូរ មានទីលំនៅភូមិក្បាលកោះតូច ឃុំតាលន់ស្អាង ខេត្តកណ្តាល ។

នៅថ្ងៃកើតហេតុខាងលើ ជនរងគ្រោះបានទៅរត់បង្ហោះខ្លែងលេង នៅមាត់ច្រាំងទន្លេជាមួយក្មេងៗ នៅផ្ទះជិតគ្នាមានចំនួន៤នាក់ ជាធម្មតាដូចរាល់ថ្ងៃ នៅពេលរត់តាមមាត់ច្រាំងទន្លេ ដោយមានបាវខ្សាច់ច្រក ទប់ការពារច្រាំងទន្លេកុំឱ្យបាក់ ពេលនោះជនរងគ្រោះ ក៏រអិលជើងធ្លាក់ចូលទៅក្នុងទឹកទន្លេតែម្តង ពេលនោះក្មេងៗ០៣នាក់ទៀត ដែលរត់លេងជាមួយគ្នានោះ ក៏រត់ទៅផ្ទះប្រាប់ជីតាជនរងគ្រោះថា អាប៊ីវារអិលជើងធ្លាក់ក្នុងទឹកទន្លេហើយ ពេលនោះជីតានិងញាតិជិតខាង ក៏ទៅរកខ្មែរឥស្លាមឱ្យជួយមុជទឹករក។ លុះដល់វេលាម៉ោង១៧និង១០នាទី ថ្ងៃដដែលក៏បានរកឃើញជនរងគ្រោះ នៅក្នុងទឹកទន្លេរួចក៏ស្រង់ឡើងពីក្នុងទឹកមក។

ទទួលបានព៌ត៌មាននេះភ្លាម កម្លាំងប៉ុស្តិ៍នគរបាលរដ្ឋបាលតាលន់ និងកម្លាំងផ្នែកពិនិត្យវិភាគកន្លែងកើតស្រុកស្អាង បានចុះទៅដល់កន្លែងកើតហេតុ និងបានធ្វើការពិនិត្យលើសពជនរងគ្រោះ ពុំមានស្លាកស្នាមអ្វីគួរឲ្យកត់សំគាល់ឡើយ ។

ក្រុមគ្រួសារជនរងគ្រោះ បានទទួលស្គាល់ថា ជនរងគ្រោះពិតជាបានលង់ទឹកស្លាប់ពិតប្រាកដមែន ។ សាកសពកុមាររងគ្រោះ ត្រូវបានប្រគល់ជូនក្រុមគ្រួសារធ្វើបុណ្យបតាមប្រពៃណី៕