ផ្ទះ ព័ត៌មានជាតិ យុវជន​ម្នាក់ ...

យុវជន​ម្នាក់ មានគំនុំជាមួយភ្ញៀវកូនកំលោះ កាប់ប៉ះចំបងជីដូនមួយ បណ្តាលឲ្យស្លាប់ក្នុងថ្លុកឈាម​​

0

​កំពង់ចាម:​ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា កាលពី​ថ្ងៃ​ទី​២៣​ ខែមករា​ ឆ្នាំ​២០២១​ នា​វេលា​ម៉ោង​ ២៣​និង​២០​នាទី​ នៅ​ចំណុច​ភូមិ​តាំង​ជ្រៃ​ ឃុំ​សណ្ដែក​ ស្រុក​បា​ធា​យ​ ខេត្តកំពង់ចាម​ មាន​ករណី​ឃាតកម្ម​មួយ​កើតឡើង​ ដែល​បង្ក​ឡើង​ដោយ​ជនសង្ស័យ​មិន​ស្គាល់​អត្តសញ្ញាណ​ បាន​ធ្វើ​សកម្មភាព​កាប់​ទៅ​លើ​ឈ្មោះ​ ឌឿ​ន​ តូច​ ភេទ​ប្រុស​ អាយុ​៣១​ឆ្នាំ​ ជនជាតិ​ខ្មែរ​ មាន​ទីលំ​នៅ​ភូមិ​-​ឃុំ​កើតហេតុ​ខាងលើ​ ដែល​បាន​មក​ចូលរួម​ពិធី​មង្គល​ការកូន​របស់​ឈ្មោះ​ ភ​ន​ រ៉ា​ ភេទ​ប្រុស​ នៅ​ភូមិ​តាំង​ជ្រៃ​ ឃុំ​សណ្ដែក​ ស្រុក​បា​ធា​យ​នេះ​ដែរ​ ។​

​សមត្ថកិច្ច​បាន​ឲ្យ​ដឹង​ថា​ បន្ទាប់​ពី​ហូប​ការ​រួច​ ជន​រង​គ្រោះ​បាន​ដើរ​ចេញពី​រោងការ​ទៅ​យក​ម៉ូតូ​របស់​ខ្លួន​ ដែល​ផ្ញើ​ទុក​នៅ​នឹង​ផ្ទះ​របស់​ឈ្មោះ​ ភ​ន​ ម៉ូត​ ភេទ​ស្រី​ នៅ​ខាងត្បូង​រោងការ​ ដោយ​ដើរ​តាម​ផ្លូវលំ​បាន​ប្រហែល​ ៧០​ម៉ែត្រ​ បម្រុង​ទៅ​យក​ម៉ូតូ​ត្រឡប់​ទៅ​ផ្ទះ​វិញ​ ក៏​ត្រូវ​ជនល្មើស​លប​កាប់​នឹង​កាំបិត​បណ្ដាល​ឲ្យ​រង​របួស​ផ្នែក​មុខជា​ច្រើន​កាំបិត​ រយះ​កំភួនដៃ​ និង​ដាច់​កដៃ​ខាងឆ្វេង​ បណ្ដាល​ឲ្យ​ស្លាប់​នៅ​កន្លែង​កើត​ហេតុតែ​ម្ដង​ ។​

ដោយ​ភូមិសាស្ត្រ​កើតហេតុ​ ស្ថិត​តំបន់​ដាច់​ស្រយាល​ និង​ការ​ផ្ដល់​ព័ត៌មាន​មានការ​យឺតយ៉ាវ​ ធ្វើ​ឲ្យ​ជន​បង្ក​មានឱកាស​រត់គេច​ខ្លួន​ ។​

ក្រោយ​ទទួល​បាន​សេចក្ដីរាយការណ៍​ ពី​អធិការ​នគរបាល​ស្រុក​បា​ធា​យ​ លោក​ឧត្តមសេនីយ៍ទោ​ ឯម​ កុសល​ ស្នងការ​នគរបាល​ខេត្ត​ បាន​ចាត់​ឲ្យ​វរសេនីយ៍ឯក​ ចាន់​ ហោ​ អនុប្រធាន​ផែន​ការងារ​នគរបាល​ព្រហ្មទណ្ឌ​ខេត្ត​ ដឹកនាំ​កម្លាំង​ជំនាញ​នគរបាល​ព្រហ្មទណ្ឌ​កម្រិត​ធ្ងន់​ កម្លាំង​ជំនាញ​បច្ចេកទេស​វិទ្យាសាស្ត្រ​ខេត្ត​ កម្លាំង​ជំនាញ​ស្រុក​ ដឹកនាំ​ដោយ​វរសេនីយ៍ឯក​ សំ​ ណា​ល់​ អធិការ​នគរបាល​ស្រុក​ និង​កម្លាំង​ប៉ុស្តិ៍​នគរបាល​រដ្ឋបាល​សណ្ដែក​ ចុះ​ដល់ទី​តាំង​កើតហេតុ​ធ្វើការ​ស្រាវជ្រាវ​ស៊ើបអង្កេត​ ជា​បន្ទាន់​ ។​

រហូត​ដល់​ថ្ងៃ​ទី​២៥​ ខែ​ឆ្នាំ​ដដែល​ នៅ​វេលា​ម៉ោង​ ២០​និង​០០​នាទី​ ទើប​ឈាន​ដល់​ការ​ឃាត់ខ្លួន​មុខសញ្ញា​ធ្វើ​សកម្មភាពម្នាក់ឈ្មោះ​ តឿន​ ទុំ​ ភេទ​ប្រុស​ អាយុ​១៩​ឆ្នាំ​ជាតិខ្មែរ​ រស់នៅ​ភូមិ​-​ឃុំ​កើតហេតុ​ ។​

ក្រោយ​ពី​បាន​ធ្វើការ​សាកសួរ​ ជនសង្ស័យ​បាន​ឆ្លើយ​សារភាព​ថា​ ខ្លួន​ពិតជា​បាន​ធ្វើ​សកម្មភាព​យក​ដាវ​កាប់​ទៅ​លើ​ជន​រង​គ្រោះ​ ដែល​ត្រូវជា​បងជីដូនមួយ​នេះ​ពិតប្រាកដ​មែន​ មូលហេតុ​កាប់​ច្រឡំ​រឿង​គំនុំ​ពី​ថ្ងៃ​ ជាមួយ​ភ្ញៀវ​ខាង​កូនកំលោះ​ ព្រមទាំង​បាន​ដកហូត​វត្ថុ​តាង​ ដាវ​ចំនួន​០១​ផង​ដែរ​ ។​

ខណ​:​នេះ​សមត្ថកិច្ច​ បាន​ឃាត់ខ្លួន​ជនសង្ស័យ​ជា​បណ្ដោះអាសន្ន​ នៅ​អធិការដ្ឋាន​នគរបាល​ស្រុក​បា​ធា​យ​ តាម​បទបញ្ជា​របស់​ព្រះរាជអាជ្ញា​រង​ នៃ​អយ្យការ​អម​សាលាដំបូង​ខេត្ត​ និង​កំពុង​ចងក្រង​សំណុំរឿង​ ដើម្បី​បញ្ជូន​ទៅ​តុលាការ​ ៕

មតិយោបល់