កំពង់ធំ: យោងតាមផេក អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានឲ្យដឹងថា នៅថ្ងៃអង្គារ ១២រោច ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៩ ខែកុម្ភ: ឆ្នាំ២០២១ មន្ត្រីសាខា ក.ប.ប. ខេត្តកំពង់ធំ ដោយមានការសហការពីមន្ត្រីមន្ទីរពាណិជ្ជកម្មខេត្ត និងអាជ្ញាធរដែនដី បានបន្តចុះផ្សព្វផ្សាយអំពីគុណភាព សុវត្ថិភាពម្ហូបអាហារ និងត្រួតពិនិត្យផលិតផលម្ហូបអាហារ និងទំនិញវេចខ្ចប់ស្រាប់ នៅផ្សារកំពង់ធំ ក្នុងទីរួមខេត្តកំពង់ធំ។ គោលដៅសំខាន់នៃការត្រួតពិនិត្យគឺដើម្បីស្រាវជ្រាវទប់ស្កាត់ការចរាចរណ៍ទំនិញខូចគុណភាព ក្លែងបន្លំស្លាកសញ្ញា ផុតកំណត់កាលបរិច្ឆេទប្រើប្រាស់ និងមានសារធាតុគីមីហាមឃាត់។

ក្នុងសកម្មភាពនេះ មន្ត្រីជំនាញបានការធ្វើវិភាគបឋមទៅលើគំរូម្ហូបអាហារមួយចំនួន ដើម្បីស្វែងរកសារធាតុគីមីហាមឃាត់ ដែលអាចធ្វើឱ្យប៉ះពាល់ដល់សុខភាពប្រជាពលរដ្ឋ។ ជាមួយគ្នានោះមន្ត្រីជំនាញក៏បានធ្វើការត្រួតពិនិត្យរកភាព មិនអនុលោមរបស់ទំនិញ នៅលើសម្បកវេចខ្ចប់ផងដែរ។

ជាលទ្ធផលមន្ត្រីជំនាញ បានរកឃើញទំនិញមានផ្ទុកសារធាតុគីមីហាមឃាត់ និងហួសកាលបរិច្ឆេទប្រើប្រាស់ ប្រមាណ ៤៣.៥១១គីឡូក្រាម រួមមាន៖
– បង្កាស្រស់ ចាក់ចាហួយ ចំនួន ១០.៣០គីឡូក្រាម
– ពពុះណ្តែក មានសារធាតុគីមី បូរ៉ាក់ (Borax) ចំនួន ៣.៥គីឡូក្រាម
– នំធុង ហួសកាលបរិច្ឆេទប្រើប្រាស់ ចំនួន ០១ធុង ស្មើនឹង ១.៣គីឡូក្រាម
– ប្រហិត ខូចគុណភាព ចំនួន ០៧កញ្ចប់ ស្មើនឹង ៧គីឡូក្រាម
– គុយទាវកញ្ចប់ ហួសកាលបរិច្ឆេទប្រើប្រាស់ ចំនួន ៤៦កញ្ចប់ ស្មើនឹង ៣.២៦៦គីឡូក្រាម
– មីកំប៉ុង ហួសកាលបរិច្ឆេទប្រើប្រាស់ ចំនួន ៣៣កំប៉ុង ស្មើនឹង ២.១៤៥គីឡូក្រាម
– ទឹកក្រូចដប ហួសកាលបរិច្ឆេទប្រើប្រាស់ ចំនួន ០៥ដប ស្មើនឹង ១៥លីត្រ
– ភេសជ្ជ:ប៉ូវកម្លាំង ហួសកាលបរិច្ឆេទប្រើប្រាស់ ចំនួន ០៤កំប៉ុង ស្មើនឹង ១លីត្រ

បន្ទាប់មក មន្ត្រីសាខា ក.ប.ប. បានធ្វើកំណត់ហេតុដកហូត ទំនិញទាំងនោះយកមករក្សាទុក ដើម្បីកម្ទេចចោលនៅពេលក្រោយ ។ ទន្ទឹមនឹងនោះមន្ត្រីជំនាញក៏បានធ្វើការណែនាំដល់អាជីវករផ្សេងទៀត ឱ្យយល់ដឹង និងអនុវត្តទៅតាមច្បាប់ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ព្រមទាំងច្បាប់ស្តីពីកិច្ចការពារអ្នកប្រើប្រាស់ ជៀសវាងបង្កផលប៉ះពាល់ដល់សុខភាពប្រជាពលរដ្ឋ និងអាចប្រឈមចំពោះមុខច្បាប់ថែមទៀត៕