កំពង់ឆ្នាំងៈ នៅថ្ងៃពុធ ១៣កើត ខែផល្គុន ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី២៤ ខែកុម្ភៈ ឆ្នាំ២០២១ វេលាម៉ោង០៥ និង៣៦នាទី នៅលើផ្លូវជាតិលេខ៥ ចន្លោះបង្គោលគីឡូម៉ែត្រលេខ៥២-៥៣ ក្នុងភូមិសាលាលេខប្រាំ ឃុំអូរឫស្សី ស្រុកកំពង់ត្រឡាច ខេត្តកំពង់ឆ្នាំង មានករណីគ្រោះថ្នាក់ចរាចរណ៍មួយកើតឡើង រវាងរថយន្តម៉ាក LAND CRUISER GXR ពណ៌ស ពាក់ផ្លាកលេខ ONG46 2-021 ដោយអ្នកបើកបរឈ្មោះ អឿន ដារ៉ាវិឆ័យ ភេទប្រុស អាយុ៣១ឆ្នាំ (ឃាត់ខ្លួន) ជនជាតិខ្មែរ រស់នៅភូមិត្រពាំងកក់ ឃុំម្កាក់ ស្រុកអង្គស្នួល ខេត្តកណ្ដាល ។

ករណីគ្រោះថ្នាក់ចរាចរណ៍ខាងលើនេះ ដើមហេតុគឺអ្នកបើកបររថយន្តខាងលើ បានឈប់រថយន្តនៅស្ងៀម ហើយនៅពេលអ្នកបើករថយន្ត បានដើរចូលរថយន្តវិញ រួចបិទទ្វារម្តងហើយតែបិទមិនជិត រួចទាញទ្វារបិទម្ដងទៀត ក៏ត្រូវម៉ូតូម៉ាកហុងដាឌ្រីម ពណ៌ខ្មៅ ពាក់ផ្លាកលេខ កំពង់ឆ្នាំង 1E-9916 អ្នកបើកបរឈ្មោះ ហ៊ីម ស៊ីតទី ភេទស្រី អាយុ១៥ ឆ្នាំ ជនជាតិចាម រស់នៅភូមិព្រៃពីស ឃុំច្រេស ស្រុកកំពង់ត្រឡាច ខេត្តកំពង់ឆ្នាំង រងរបួសធ្ងន់ និងអ្នករួមដំណើរឈ្មោះ រឹទ្ធ ធីតា ភេទស្រី អាយុ១៥ឆ្នាំ ជនជាតិខ្មែរ រស់នៅភូមិ-ឃុំ ជាមួយអ្នកបើកបរ ,បើកបរពីទិសខាងត្បូងឆ្ពោះទៅទិសខាងជើង បានបុកទ្វាររថយន្តម៉ាក LAND CRUISER GXR ក៏បានដួលនៅលើផ្លូវ ហើយត្រូវរថយន្តដែលមិនស្គាល់ម៉ាក មិនស្គាល់ផ្លាកលេខ បើកបរពីទិសខាងត្បូងឆ្ពោះទៅទិសខាងជើង ក្នុងដំណើរស្របទិសគ្នា បានបុកអ្នកបើកបរម៉ូតូរងរបួស ហើយបន្តបើករថយន្តគេចខ្លួនបាត់ ។ ចំណែកជនរងគ្រោះ ត្រូវដឹកបញ្ជូនមកកាន់មន្ទីរពេទ្យ ដើម្បីជួយព្យាបាល ។

ក្រោយពេលកើតហេតុ កម្លាំងសមត្ថកិច្ចជំនាញ ចុះមកវាស់វែងយកវត្ថុតាងរទៅក្សាទុក នៅអធិការរដ្ឋាននគរបាលស្រុកកំពង់ត្រឡាច ដើម្បីដោះស្រាយបន្តតាមផ្លូវច្បាប់ ៕