កំពង់ឆ្នាំង: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា បុរសម្នាក់បានស្លាប់នៅកន្លែងកើតហេតុ ក្នុងហេតុការណ៍គ្រោះថ្នាក់ចរាចរណ៍រវាងរថយន្តក្រុមហ៊ុនដឹកជញ្ជូនរបស់ក្រុមហ៊ុន រស្មីបូព៌ាបុកជាមួយម៉ូតូ ។
ករណីនេះកើតឡើងនៅថ្ងៃសុក្រ ៦កើត ខែចេត្រ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៩ ខែមីនា ឆ្នាំ២០២១ វេលាម៉ោង០៥និង៤៥នាទី លើកំណាត់ផ្លូវជាតិលេខ០៥ ចន្លោះគីឡូម៉ែត្រលេខ៤៤-៤៥ ស្ថិតក្នុងភូមិចម្ការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង ។
សមត្ថកិច្ចបានឲ្យដឹងថា រថយន្តម៉ាក KIA ពណ៌ទឹកមាស ពាក់ផ្លាកលេខ ភ្នំពេញ 3D-7541 អ្នកបើកបរមិនស្គាល់ឈ្មោះ និងអត្តសញ្ញាណ (ជារថយន្តក្រុមហ៊ុនដឹកជញ្ជូន រស្មីបូព៌ា) បានធ្វើដំណើរក្នុងទិសខាងជើងទៅទិសខាងត្បូង ។ លុះមកដល់ចំណុចកើតហេតុ បានបុកម៉ូតូ១គឿងម៉ាក HONDA C100 ពណ៌ក្រហម ពាក់ផ្លាកលេខ ក4149-ប ផ1 បើកបរដោយឈ្មោះ សុខ យ៉ាន ភេទប្រុស អាយុ៦៦ឆ្នាំ មានទីលំនៅភូមិស្តុក ឃុំភ្នំបាត ស្រុកពញាឮ ខេត្តកណ្តាល ក្នុងដំណើរច្រាសទិសគ្នា បណ្តាលឲ្យស្លាប់នៅកន្លែងកើតហេតុ ។
បន្ទាប់ពីកើតហេតុ កម្លាំងជំនាញបានចុះធ្វើការវាស់វែង និង នាំយកមធ្យោបាយទាំង២គ្រឿងទៅរក្សាទុកនៅប៉ុសិ៍្តនគរបាលរដ្ឋបាលសេដ្ឋី ដើម្បីកសាងសំណុំរឿងចាត់ការទៅតាមនីតិវិធីច្បាប់ ។ ចំណែកសាកសពជនរងគ្រោះ ប្រគល់ជូនក្រុមគ្រួសារយកធ្វើបុណ្យតាមប្រពៃណី ៕
មតិយោបល់