មណ្ឌលគិរី: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា ឪពុកនិងកូនស្រី បានស្លាប់ភ្លាមៗ នៅនឹងកន្លែងកើតហេតុ បន្ទាប់ពីមានរថយន្តមួយគ្រឿង ដែលបើកស្របទិសគ្នា បានបើកកៀរម៉ូតូបណ្តាលឲ្យដួលហើយអូសជាប់ជាមួយរថយន្តចម្ងាយ១៥ម៉ែត្រ កាលពីទី១៩ ខែមីនា ឆ្នាំ២០២១ នៅលើដងផ្លូវជាតិលេខ៧៦A ត្រង់ចន្លោះគីឡូម៉ែត្រលេខ១០៨-១០៩ វេលាម៉ោង១៩និង៣០នាទីយប់ ។
តាមរបាយការណ៍របស់ កម្លាំងសមត្ថកិច្ច នៃអធិការដ្ឋាននគរបាល ស្រុកអូររាំងបានឲ្យដឹងថា ជនរងគ្រោះមានឈ្មោះ គឹម គ្វេន ភេទប្រុស អាយុ៣២ឆ្នាំ ជនជាតិព្នង និងកូនស្រីរួមដំណើរជាមួយមានឈ្មោះ គ្វេន ពង ភេទស្រី អាយុ០៨ ឆ្នាំ រស់នៅភូមិពូតាំង សង្កាត់រម្យនា ក្រុងសែនមនោរម្យ ខេត្តមណ្ឌលគិរី ។ ជនរងគ្រោះបើកម៉ូតូម៉ាកឆ្លាមពណ៌ខ្មៅ គ្មានផ្លាកលេខ បើកបរក្នុងទិសដៅពីកើតទៅលិច ឆ្ពោះទៅចំណុចភូមិពូរាំង ឃុំសែនមនោរម្យ ស្រុកអូរាំង ខេត្តមណ្ឌលគិរី ។ រីឯរថយន្តជនបង្ក ពុំទាន់បានស្គាល់អត្តសញ្ញាណនៅឡើយ ដោយជនបង្កបានបើករថយន្តគេចខ្លួនបាត់។
បច្ចុប្បន្នកម្លាំងសមត្ថកិច្ច ផ្នែកសណ្តាប់ធ្នាប់ កំពុងស្វែងរកម្ចាស់រថយន្តបង្ក យកមកផ្តន្ទាទោសទៅតាមនីតិវិធី ។
ក្រោយពីបានចុះពិនិត្យដល់កន្លែងកើតហេតុ កម្លាំងសមត្ថកិច្ចនៃអធិការដ្ឋាននគរបាលស្រុកអូររាំង បានប្រគល់សពជនរងគ្រោះទាំងពីរនាក់ឪពុកនិងកូន ឲ្យក្រុមគ្រួសារយកទៅធ្វើបុណ្យតាមប្រពៃណី ៕
មតិយោបល់