ភ្នំពេញៈ នៅវេលាម៉ោង១១ និង ៣២ នាទីយប់ថ្ងៃទី១១ ខែមិថុនា ឆ្នាំ២០២១ មានករណីគ្រោះថ្នាក់ចរាចរណ៍មួយកើតឡើង ជនជាតិចំនួន២នាក់ បើករថយន្តស៊េរីទំនើបមួយគ្រឿង ក្នុងល្បឿនលឿន ជ្រុលទៅបុករថយន្តឡង់គ្រីស័រ កំពុងបើកឆ្លងផ្លូវពេញទំហឹង បណ្តាលឲ្យខ្ទេចមុខស្ទើរទាំងស្រុង ស្ថិតតាមបណ្ដោយផ្លូវលេខ៣៣៧ ក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ ។

នៅមុនពេលកើតហេតុ គេបានឃើញរថយន្តឡង់គ្រីស័រមួយគ្រឿង ពណ៌ខ្មៅ ពាក់ផ្លាកលេខ នគរបាល ២-៩៤៩៩ បើកបរដោយបុរសម្នាក់ ធ្វើដំណើរតាមបណ្តោយផ្លូវលេខ៣៣៧ ទិសដៅពីលិចទៅកើត ក្នុងល្បឿនលឿន ។ លុះពេលបើកបរមកដល់ត្រង់ចំណុចកើតហេតុ ត្រង់ផ្លូវបែកជា៤ ស្រាប់តែមានរថយន្តស៊េរីទំនើបមួយគ្រឿងទៀត ពណ៌ទឹកប្រាក់ ពាក់ផ្លាកលេខ ភ្នំពេញ 2BL ៨៥៥៧ បើកបរដោយបុរសជនជាតិចិនមានគ្នាចំនួន២នាក់ ទិសដៅពីត្បូងទៅជើងក្នុងល្បឿនយ៉ាងលឿន ជ្រុលបុកចំខាងមុខពេញទំហឹង បណ្តាលឲ្យរងការខូចខាតធ្ងន់ធ្ងរ ។

បន្ទាប់ពីកើតហេតុរួច សមត្ថកិច្ចនៅក្នុងមូលដ្ឋាន លោកក៏បានចុះទៅដល់ចំណុចកើតហេតុ ធ្វើការពិនិត្យវាស់វែង យករថយន្តទាំងពីរគ្រឿងទៅរក្សាទុក ជាបណ្តោះអាសន្ន នៅអធិការដ្ឋាននគរបាលខណ្ឌទួលគោក ដើម្បីដោះស្រាយតាមនីតិវិធីផ្លូវច្បាប់ ។ សូមបញ្ជាក់ថា ករណីខាងលើនេះ មិនមាននរណាម្នាក់ រងគ្រោះថ្នាក់នោះទេ ៕