កំពង់ឆ្នាំង: នៅវេលាម៉ោងប្រមាណ២០និង០០នាទី ថ្ងៃទី១៣ ខែមិថុនា ឆ្នាំ២០២១ ដោយមានការសម្របសម្រួល ពីឯកឧត្តមព្រះរាជឣាជ្ញា និងមានការបញ្ជាផ្ទាល់ ពីលោកឧត្តមសេនីយ៍មេបញ្ជាការ កម្លាំងកងរាជឣាវុធហត្ថខេត្តកំពង់ឆ្នាំង ចំនួន០៨នាក់ ដឹកនាំដោយលោកវរសេនីយ៍ត្រី ព្រំ ស៊ីណេ ប្រធានមន្ទីរស្រាវជ្រាវ និងបង្ក្រាបបទល្មើស ប្រើប្រាស់មធ្យោបាយ រថយន្តចំនួន០២គ្រឿង បានពន្លាតដែនសមត្ថកិច្ច សហការជាមួយកងរាជឣាវុធហត្ថខេត្តពោធិ៍សាត់ ចុះបង្ក្រាបបទល្មើសរក្សាទុក ជួញដូរ ចែកចាយ និងប្រើប្រាស់ដោយខុសច្បាប់នូវសារធាតុញៀនចំនួន០១ករណី ស្ថិតនៅចំណុចភូមិស្វាយចេកជើង សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ បានធ្វើការឃាត់ខ្លួនជនសង្ស័យចំនួន០៣នាក់ ។

១.ឈ្មោះ ហួយ ស្រីណាង ភេទស្រី អាយុ៣៨ឆ្នាំ រស់នៅភូមិស្វាយចេកជើង សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ ។
២.ឈ្មោះ បូ បឿន ភេទប្រុស ឣាយុ៣៥ឆ្នាំ រស់នៅភូមិដងរុង ឃុំកោះជុំ ស្រុកកណ្តៀង ខេត្តពោធិ៍សាត់ ។
៣.ឈ្មោះ សន សុផាត ភេទប្រុស ឣាយុ២៥ឆ្នាំ រស់នៅភូមិចម្ការចេកជើង សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ ។

វត្ថុតាងចាប់យករួមមាន៖
១.ថ្នាំញៀន (សង្ស័យម៉ាទឹកកក) ចំនួន០២កញ្ចប់ធំ និង០៣កញ្ចប់តូច ទម្ងន់១៥៨.៩១ក្រាម (ថ្លឹងទាំងថង់វេចខ្ចប់) ។
២.ទូរស័ព្ទដៃចំនួន០៤គ្រឿង ។
៣.ជញ្ជីងថ្លឹងថ្នាំញៀនចំនួន០១គ្រឿង ។
៤.ប្រាក់រៀលចំនួន៥០០.០០០(ហាសិបម៉ឺនរៀល) ។

បច្ចុប្បន្ន ជនសង្ស័យរួមទាំងវត្ថុតាង ការិយាល័យជំនាញបានកសាងនីតិវិធី បញ្ជូនទៅសាលាដំបូងខេត្តកំពង់ឆ្នាំង ៕