ភ្នំពេញ: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា ជនសង្ស័យម្នាក់ ក្នុងចំណោមបក្ខពួក០២នាក់ ដែលធ្វើសកម្មភាពលួចកាបូបលុយមានមាស និងប្រាក់ជាច្រើនពីក្នុងរថយន្តរបស់ជនរងគ្រោះ០២នាក់ប្តីប្រពន្ធ ដែលចតរថយន្តចោលដាក់កាបូបក្នុងរថយន្តនៅខណ្ឌច្បារអំពៅ រាជធានីភ្នំពេញ ត្រូវបាននគរបាលខណ្ឌច្បារអំពៅ ចាប់ខ្លួនជនសង្ស័យម្នាក់ ចំណែកម្នាក់ទៀតគេចខ្លួនបាត់ ។
បើតាមនគរបាលខណ្ឌច្បារអំពៅឱ្យដឹងថា នៅស្ថានីយប្រេង CalTex ផ្លូវជាតិលេខ១ ភូមិដើមអំពិល សង្កាត់ច្បារ អំពៅ១ ខណ្ឌច្បារអំពៅ នៅថ្ងៃទី១៤ ខែកក្កដា ឆ្នាំ២០២១ ម៉ោង០១រសៀល ជនរងគ្រោះឈ្មោះ ជា សុខជាតិ ភេទប្រុស អាយុ៤៥ឆ្នាំ ជនជាតិខ្មែរ មុខរបរកសិករ និងប្រពន្ធ រស់នៅភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្តាល បានបើករថយន្តម៉ាក Lexus RX-៣០០ មកចតនៅក្នុងស្ថានីយប្រេង CalTex ខាងលើ ពុំបានចាក់សោទ្វាររថយន្តនោះទេ រួចនាំគ្នាទៅទិញផ្លែធុរ៉េននៅក្បែរនោះ ស្រាប់តែមានជនសង្ស័យ០២នាក់ ឈ្មោះ ហែម សុងហេង និងឈ្មោះ រុក ជិះកង់០១គ្រឿង ពណ៌ទឹកប្រាក់មកឈប់ក្បែររថយន្ត រួចនាំគ្នាបើកទ្វាររថយន្តលួចយកកាបូបលុយជនរងគ្រោះចេញទៅបាត់ ដោយក្នុងកាបូបមាន៖ ខ្សែកមាស ១ខ្សែ មានបណ្តោងរូបផ្កា ទម្ងន់២តម្លឹង, ខ្សែកប្លាទីន ១ខ្សែ មានបណ្តោងរូបមាន់ ទម្ងន់ ១តម្លឹង, លុយខ្មែរ ១,៣៥០,០០០រៀល, អត្តសញ្ញាណបណ្ណសញ្ជាតិខ្មែរ ០១សន្លឹក និងទូរស័ព្ទដៃ០១គ្រឿង ម៉ាក Samsung Note-៨ ពណ៌ខ្មៅ ហើយ នាំគ្នាជិះកង់គេចខ្លួន។
នគរបាលខណ្ឌច្បារអំពៅឱ្យដឹងទៀតថា ក្រោយពីបាត់កាបូបលុយនោះហើយ ជនរងគ្រោះបានមកប្តឹងនគរបាលខណ្ឌច្បារអំពៅ លុះដល់ម៉ោង៥និង៣០នាទីល្ងាច ថ្ងៃដដែល នគរបាលខណ្ឌច្បារអំពៅឃាត់ខ្លួនបានជនសង្ស័យម្នាក់ឈ្មោះ ហែម សុងហេង នៅចំណុចភូមិដើមស្លែង សង្កាត់ ច្បារអំពៅ២ ខណ្ឌច្បារអំពៅ ដកហូតបានវត្ថុតាងកង់០១គ្រឿង (ជិះធ្វើសកម្មភាព) និងខ្សែកចំនួន២ខ្សែខាងលើ (របស់ជនរងគ្រោះ) បញ្ជូនមកអធិការដ្ឋាននគរបាលខណ្ឌច្បារអំពៅចាត់ការតាមច្បាប់។
ជនសង្ស័យឈ្មោះ ហែម សុងហេង ភេទប្រុស អាយុ១៩ឆ្នាំ ជនជាតិខ្មែរ គ្មានមុខរបរពិតប្រាកដ ស្នាក់នៅផ្ទះជួល ភូមិតាងៅ សង្កាត់និរោធ ខណ្ឌច្បារអំពៅ ជាមុខសញ្ញាប្រើប្រាស់គ្រឿងញៀន។ ចំណែកបក្ខពួកជនសង្ស័យម្នាក់ទៀតនគរ បាលខណ្ឌច្បារអំពៅ កំពុងតាមស្រាវជ្រាវស្វែងរកចាប់ខ្លួន ៕
មតិយោបល់