ភ្នំពេញៈ ករណីអគ្គិភ័យដែលឆាបឆេះហាងផឹកស៊ីមួយកន្លែងយីហោ អាល័យ នៅមុខភោជនីយដ្ឋាន លីកាដូ កាលវេលាម៉ោង៣រសៀលថ្ងៃទី១៦ ខែសីហា ឆ្នាំ២០១៦ ដែលស្ថិតនៅផ្ទះលេខ១២០អី តាមបណ្តោយផ្លូវជាតិលេខ៦ ក្រុម៣ ភូមិគៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

ម្ចាស់បន្ទប់ឈ្មោះ សេង សោភ័ណ្ឌ ភេទស្រី អាយុ២៧ឆ្នាំ មុខរបរ អ្នកចម្រៀងនៅភោជនីយដ្ឋាន លីកាដូ ។

ប្រភពព័ត៌មានបានប្រាប់ឲ្យដឹងថា មុនពេលកើតហេតុគេបានឃើញម្ចាស់បន្ទប់ចាក់សោចេញទៅធ្វើការនៅភោជនីយដ្ឋាន លីកាដូ ដូចសព្វដង ដែលមានទីតាំងនៅមុខកន្លែងកើត។ លុះបន្តិចក្រោយមក ស្រាប់តែមានផ្សែងហុយចេញ និងអន្តាតភ្លើងចេញតាមបង្អួច បានបង្កឲ្យមានការភ្ញាក់ផ្អើរដល់អ្នកជិតខាង រួចក៏បានរាយការណ៍ទៅប្រាប់សមត្ថកិច្ចមូលដ្ឋានឲ្យជួយចុះមកអន្តរាគមន៍។

ក្រោយពីសមត្ថកិច្ចបានទទួលដំណឹងនេះរួចមក កម្លាំងសមត្ថកិច្ចបានចេញអន្តរាគមន៍ហៅរថយន្តពន្លត់អគ្គិភ័យចំនួន០៨គ្រឿង ដោយក្នុងនោះ មានរថយន្តពន្លត់អគ្គិភ័យរបស់ក្រុមហ៊ុន OCIC ចំនួន ០៤គ្រឿង និងរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញចំនួន ០៤គ្រឿងផងដែរ។ ដោយនៅក្នុងហេតុការណ៍អគ្គិភ័យនោះ កម្លាំងសមត្ថកិច្ចយើងបានប្រើប្រាស់រថយន្តពន្លត់អគ្គិភ័យរបស់ក្រុមហ៊ុន OCIC ចំនួន ០២គ្រឿង និងបំពង់ពន្លត់អគ្គិភ័យចំនួន ០២បំពង់ ហើយក៏ត្រូវបានរលត់ទៅវិញនៅវេលាម៉ោង៣និង៤៥នាទីរសៀល ដោយនៅក្នុងករណីខាងលើនេះ មិនបណ្តាលឲ្យមានអ្នករងរបួសនោះឡើយ ។

ចំណែកសម្ភារៈត្រូវបានរងការខូចខាតមាន ទូរទស្សន៍ ទូដាក់ខោអាវ តុ និងសម្ភារៈមួយចំនួន មូលហេតុដោយសារតែឆ្លងចរន្តខែ្សភ្លើង៕

https://youtu.be/AbO5aKMpu-A