ពោធិ៍សាត់ៈ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា កាលថ្ងៃទី០២ ខែសីហា ឆ្នាំ២០២១ វេលាម៉ោង២ និង០០នាទីរសៀល សមត្ថកិច្ចនគរបាលក្រុងពោធិ៍សាត់ បានចាប់ឃាត់ខ្លួនបុរសម្នាក់ ពីបទហិង្សាវាយឪពុកបង្កើតបាក់ដៃ នៅចំណុចកាទិន ស្ថិតនៅភូមិរលាប សង្កាត់រលាប ក្រុងពោធិ៍សាត់ ខេត្តពោធិ៍សាត់ ។

តាមរបាយការណ៍របស់អធិការដ្ឋាននគរបាលក្រុងពោធិ៍សាត់បានឲ្យដឹងថា ករណីហិង្សានេះបង្កឡើងដោយឈ្មោះ ម៉ាន សេន ភេទប្រុស អាយុ៣៦ឆ្នាំ ជនជាតិខ្មែរឥស្លាម រស់នៅភូមិកើតហេតុខាងលើ បានយកដំបងឈើ១កំណាត់ ប្រវែង ៧តឹក វាយទៅលើឪពុកឈ្មោះ កុប ម៉ាន ភេទប្រុស អាយុ៦១ឆ្នាំ ជនជាតិខ្មែរឥស្លាម រស់នៅភូមិកើតហេតុខាងលើ បណ្តាលឲ្យរងរបួសធ្ងន់បាក់ដៃឆ្វេង ។ សមត្ថកិច្ចបានបញ្ជួនជនរងគ្រោះ ទៅព្យាបាលនៅមន្ទីរពេទ្យខេត្តពោធិ៍សាត់ ។

របាយការណ៍បានបន្តទៀតថា ករណីនេះបណ្តាលមកពីទំនាស់ពាក្យសំដីគ្នា ហើយជនសង្ស័យជាអ្នកប្រើប្រាស់គ្រឿងញៀន ។

បច្ចុប្បន្នជនសង្ស័យ ត្រូវបានសមត្ថកិច្ចចាប់ឃាត់ខ្លួន បណ្តោះអាសន្ននៅអធិការដ្នាននគរបាលក្រុងពោធិ៍សាត់ ដើម្បីចាត់ការបន្តតាមនីតិវិធី ៕