បន្ទាយមានជ័យៈ កម្លាំងនគរបាលក្រុងប៉ោយប៉ែត បានធ្វើការបង្ក្រាបឃាត់ខ្លួន ជនសង្ស័យម្នាក់ និងថ្នាំញៀន១០កញ្ចប់ នៅនឹងផ្ទះសំណាក់ បក្សីចាំក្រុង ក្នុងសង្កាត់-ក្រុងប៉ោយប៉ែត ហើយបញ្ជូនទៅ ស្នងការនគរបាល ខេត្តបន្ទាយមានជ័យ កាលពីរសៀលថ្ងៃទី១៦ ខែសីហា ឆ្នាំ២០១៦ម្សិលមិញនេះ ។
លោក ធិន ស៊ិនដេត អធិការនគរបាល ក្រុងប៉ោយប៉ែត បានឲ្យដឹងថា អនុវត្តន៍តាមផែនការ ណែនាំរបស់លោកឧត្តមសេនីយ៍ទោ អាត់ ខែម ស្នងការនគរបាល ខេត្តបន្ទាយមានជ័យ ក្នុងការបង្ក្រាបបទល្មើស កម្លាំងនគរបាល របស់លោក បានធ្វើការស្រាវជ្រាវ មុខសញ្ញាជួញដូរចែកចាយគ្រឿងញៀន ឈានដល់ការឃាត់ខ្លួន ជនសង្ស័យម្នាក់ជាមេការផ្ទះសំណាក់បក្សី ចាំក្រុងឈ្មោះ នួន រី ភេទប្រុស អាយុ៤៦ឆ្នាំ រស់នៅភូមិបាលិលេយ្យ២ សង្កាត់-ក្រុងប៉ោយប៉ែត នៅនឹងផ្ទះសំណាក់ដកហូត បានសារធាតុញៀន ជាប្រភេទម្ស៉ៅក្រាមពណ៌ស ខុសច្បាប់ចំនួន១០កូនថង់តូច ។
ក្រោយការឃាត់ខ្លួន និងសាកសួរលើជនសង្ស័យ ដើម្បីឈានទៅបង្ក្រាបបក្ខពួក ឬមុខសញ្ញាផ្សេងទៀត ជនសង្ស័យត្រូវបានបញ្ជូនទៅកាន់ ស្នងការនគរបាល ខេត្តបន្ទាយមានជ័យ ដើម្បីបញ្ជូនបន្ត ទៅតុលាការ ចាត់ការតាមនីតិវិធីច្បាប់ ៕
មតិយោបល់