ព័ត៌មានជាតិ

ក្មេង​ស្រី​ម្នាក់​លង់ទឹកស្លាប់​ ខណៈ​លេង​ទឹក​អាងរូងពេលឪពុកមាកំពុងលាងម៉ូតូ​

បន្ទាយ​មាន​ជ័យ: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា ក្មេង​ស្រី​ម្នាក់​ទៅ​តាម​ឪពុកមា​លាង​ម៉ូតូ​នៅ​អាង​រូង​ ហើយ​បាន​ចុះ​លេង​ទឹក​បណ្តាល​ឲ្យ​លង់​ស្លាប់​ ដែល​ហេតុការណ៍​នេះ​ បាន​កើតឡើង​នៅ​វេលា​ម៉ោង​១៧​និង​០០​នាទី​ ថ្ងៃ​ទី​១៨​ ខែកញ្ញា​ ឆ្នាំ​២០២១​ នៅ​ចំណុច​ស្ពាន​អាង​រូង​ ស្ថិត​ក្នុងភូមិ​ឈូក​ ឃុំ​ច​ង្ហា​ ស្រុក​អូរ​ជ្រៅ​ ខេត្ត​បន្ទាយ​មាន​ជ័យ​ ។​

​ប្រភព​ពី​នគរបាល​ស្រុក​អូរ​ជ្រៅ​ បាន​ឲ្យ​ដឹង​ថា​ ក្មេង​ស្រី​រង​គ្រោះ​ឈ្មោះ​ រួយ​ ចរិយា​ អាយុ​ ៧​ឆ្នាំ​ រស់នៅ​ភូមិ​ផ្គាំ​ ឃុំ​សិង្ហ​ ស្រុក​អូរ​ជ្រៅ​ ខេត្តបន្ទាយមានជ័យ​។​

​ប្រភព​បន្ត​ថា​ មុន​ពេល​កើតហេតុ​ វេលា​ម៉ោង​ប្រហែល​ ០៤​និង​៣០​នាទី​​ ថ្ងៃ​ទី​១៨​ ខែកញ្ញា​ ឪពុកមា​ ឈ្មោះ​ ឡាយ​ ប៊ុ​ន​រិ​ទ្ធ​ អាយុ​៣៦​ឆ្នាំ​ បាន​នាំ​កូនបង្កើត​និង​ជន​រង​គ្រោះ​ មាន​គ្នា​សរុប​០៣​នាក់​ជិះ​ម៉ូតូ​ទៅ​លេង​ទឹក​អាង​រូង​ ។​ ពេល​ដល់​ចំណុច​កើតហេតុ​ ឪពុកមា​បាន​កំពុង​លាង​ម៉ូតូ​ ហើយ​កូន​និង​ក្មួយ​លេង​ទឹកជា​មួយ​គ្នា​ដោយ​មិន​បាន​ប្រុង​ប្រយ័ត្ន​ មួយសន្ទុះ​ក្រោយមក​ស្រាប់តែ​គាត់​បានដឹង​ថា​ បាត់​ក្មួយ​សង្ស័យ​តែ​លង់ទឹក​ ក៏​បាន​ចុះ​រាវរក​ក្នុង​ទឹក​ប្រហែល​៣០​នាទី​ទើប​រក​ឃើញ​.​ហើយ​បាន​នាំ​ជន​រង​គ្រោះ​មក​សង្គ្រោះ​នៅ​មណ្ឌល​សុខភាព​សិង្ហ​តែ​ជា​អកុសល​ ជន​រង​គ្រោះ​បាន​ដាច់ខ្យល់​ស្លាប់​បាត់​មុន​មក​ដល់​មណ្ឌល​សុខភាព​។​

​ប្រភព​ដដែល​បាន​បញ្ជាក់​ថា​ ក្រោយ​ទទួល​បាន​ព័ត៌មាន​ បាន​បង្កើត​គណ:កម្មការ​ត្រួតពិនិត្យ​សព​ដែល​មាន​សមាសភាព​រួម​មាន​ នាយ​ប៉ុស្តិ៍​រដ្ឋបាល​សិង្ហ​ អាជ្ញាធរ​ឃុំ​ គ្រូពេទ្យ​ លោក​មេ​ភូមិ​ ឃើញ​ថា​កុមារី​រង​គ្រោះ​ពិតជា​ស្លាប់​ដោយ​លង់ទឹក​ប្រាកដ​មែន​ ពុំ​ស្លាកស្នាម​អ្វី​ទាក់ទង​នឹង​បទល្មើស​ព្រហ្មទណ្ឌ​ឡើយ​ រួច​បាន​ប្រគល់​សព​ឲ្យ​ក្រុម​គ្រួសារ​ចាត់ចែង​ធ្វើបុណ្យ​តាម​ប្រពៃណី​ ៕

មតិយោបល់