-

ម៉ូតូពីរគ្រឿងបើកបុកដើមត្នោតរលំកាត់ផ្លូវ បណ្ដាលឲ្យស្លាប់ម្នាក់និង២នាក់ទៀតរងរបួសធ្ងន់

ពោធិ៍សាត់ៈ យោងតាមផេក ការិយាល័យផ្សព្វផ្សាយតាមបណ្តាញសង្គម បានឲ្យដឹងថា នៅថ្ងៃទី១៧ ខែ​វិច្ឆិកា​ ឆ្នាំ២០២១ វេលា​ម៉ោង​១និង៣០នាទី​ មានករណីគ្រោះថ្នាក់ចរាចរណ៍ ម៉ូតូបើកបុកដើមត្នោតរលំកាត់ផ្លូវ បណ្ដាលឲ្យមនុស្សម្នាក់ស្លាប់ និង០២នាក់ រងរបួសធ្ងន់ នៅលើផ្លូវ​ក្រាល​កៅស៊ូ​ ស្ថិត​នៅភូមិ​វាល​វង់​ ឃុំ​ស្នា​អន្សា ស្រុកក្រគរ ខេត្តពោធិ៍សាត់ ។

លោកវរសេនីយ៍ទោ យូ គឹមថារិទ្ធី អធិការនគរបាលស្រុកក្រគរ បានឲ្យដឹងថា មុនពេលកើតហេតុមានម៉ូតូពីរគ្រឿង ទី១-ម៉ូតូ​ម៉ាកហុងដា ឌ្រីមធុន១២៥ ស៊េរី០១៥ ពណ៌ខ្មៅ ពាក់ផ្លាកលេខពោធិ៍សាត់ ​1F-4426 បើក​បរ​ដោយឈ្មោះ​ ឃុន និមឿន ភេទ​ប្រុស​ អាយុ១៦ ឆ្នាំ​ ជនជាតិ​ខ្មែរ​ រស់នៅ​ភូមិ​បេង ឃុំ​ស្នាអន្សា ស្រុក​ក្រគរ​ ខេត្ត​ពោធិ៍សាត់​ ស្លាប់​នៅ​កន្លែង​កើតហេតុ ​បើកបរក្នុងទិសដៅ ពីត្បូងទៅជើង ។ ទី២-ម៉ូតូ​ម៉ាក​ហុងដាឌ្រីមធុន​ ១២៥ស៊េរី០១៦ ពណ៌ខ្មៅ ​ពាក់ផ្លាកលេខ​ពោធិ៍សាត់ ​1G-3069 បើកបរដោយ បុរសមិន​ស្គាល់​អត្តសញ្ញាណ​ រង​របួស​ធ្ងន់​ បើកបរក្នុងទិសដៅពីត្បូងទៅជើង លុះដល់កន្លែងកើតហេតុខាងលើ បានបុកយ៉ាង ពេញទំហឹង ជាមួយដើមត្នោតរលំកាត់ផ្លូវ បណ្ដាលឲ្យមនុស្សម្នាក់ស្លាប់ និង០២នាក់រងរបួសធ្ងន់ ។

ចំពោះអ្នករងរបួសធ្ងន់ ត្រូវបានសមត្ថកិច្ច និងក្រុមគ្រូពេទ្យបញ្ជូនទៅសង្រ្គោះ នៅមន្ទីរពេទ្យបង្អែកខេត្តពោធិ៍សាត់ ។

របាយការណ៍បានឲ្យដឹងទៀតថា ករណីគ្រោះថ្នាក់ចរាចរណ៍នេះ បណ្ដាលមកពីកត្តាល្បឿន និងខ្វះការប្រុងប្រយ័ត្ន ។

រីឯម៉ូតូ០១គ្រឿង ​សមត្ថកិច្ចបាន​ប្រគល់​ឲ្យ​ក្រុម​គ្រួសារ​សព និង​ម៉ូតូ​០១គ្រឿង​ទៀត ​សមត្ថកិច្ចយកមករក្សាទុក នៅ​ប៉ុស្តិ៍​នគរបាល​រដ្ឋបាល​ស្នាអន្សា​ជា​បណ្តោះ​អាសន្ន ​៕

មតិយោបល់