ពោធិ៍សាត់ៈ យោងតាមផេកអគ្គស្នងការដ្ឋាននគរបាលជាតិបានឲ្យដឹងថា នៅពីថ្ងៃទី០៣ខែមករា ឆ្នាំ២០២២ វេលាម៉ោង ៦និង៤៥នាទីល្ងាច មានករណីគ្រោះថ្នាក់ចរាចរណ៍រវាងម៉ូតូ ២គ្រឿងប៉ះទង្គិចគ្នា បណ្ដាលឲ្យមនុស្ស០១នាក់រងរបួសធ្ងន់ និង០៤នាក់រងរបួសស្រាល នៅលើកំណាត់ផ្លូវក្រាលក្រួសក្រហម ស្ថិតនៅភូមិវាល ឃុំសំរោង ស្រុកភ្នំក្រវាញ ខេត្តពោធិ៍សាត់ ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញមានម៉ូតូ០១គ្រឿងម៉ាកវ៉េវអាល់ហ្វា ពណ៌ក្រហម គ្មានស្លាកលេខ បើកបរដោយបុរសឈ្មោះ សុខ ថន ភេទប្រុស អាយុ ៣១ឆ្នាំ និងមានឌុបគ្នា ៣នាក់ មានទីលំនៅភូមិ ឃុំកើតហេតុ (រងរបួសស្រាល) ។
ប្រភពបន្តថា ពេលមកលុះដល់កន្លែងកើតហេតុខាងលើ បានប៉ះជាមួយម៉ូតូ ០១គ្រឿងទៀតម៉ាក វ៉េវអាល់ហ្វាចាស់ ពណ៌ខ្មៅ គ្មានស្លាកលេខ និងគ្មានភ្លើងបំភ្លឺផ្លូវ បើកបរដោយឈ្មោះ ក្អាត់ ហ៊ា ភេទប្រុស អាយុ ២៧ឆ្នាំ មុខរបរកសិករ រស់នៅភូមិឃុំកើតហេតុខាងលើ រងរបួសស្រាល បើកបរពីកើតទៅលិច ក្នុងទិសដៅបញ្ច្រាសទិសគ្នា ។ ចំពោះអ្នករងរបួសធ្ងន់ស្រាលត្រូវបានសមត្ថកិច្ច និងក្រុមគ្រូពេទ្យបញ្ជូនទៅសង្គ្រោះនៅមន្ទីរពេទ្យបង្អែកស្រុកភ្នំក្រវាញ។
លោកវរសេនីយ៍ឯក តាន់ គារិទ្ធ អធិការនគរបាលស្រុកភ្នំក្រវាញ បានឲ្យដឹងទៀតថា បន្ទាប់ពីកម្លាំងនគរបាលចរាចរណ៍បានចុះទៅពិនិត្យនិងធ្វើការវាស់វែងរួចហើយ បានសន្និដ្ឋានថា ករណីគ្រោះថ្នាក់ចរាចរណ៍នេះបណ្ដាលមកពីកត្តាល្បឿន បើកបរមិនប្រកាន់ស្តាំ និង អ្នកបើកបរមិនមានមួកសុវត្ថិភាព ។ ចំពោះម៉ូតូទាំង០២គ្រឿងសមត្ថកិច្ចបានយកមករក្សាទុកនៅអធិការដ្ឋាននគរបាលស្រុកភ្នំក្រវាញ រង់ចាំការដោះស្រាយតាមនីតិវិធី ៕
មតិយោបល់