បាត់ដំបង: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា កាលពីថ្ងៃទី០៧ ខែមករា ឆ្នាំ ២០២១ វេលាម៉ោង០២និង៣០នាទីរំលងអធ្រាត្រ ត្រង់ចំណុចវត្តភូមិបឹងក្រឡ ឃុំបឹងប្រាំ ស្រុកបវេល មានករណីអគ្គិភ័យឆេះរថយន្តរបស់កងវិស្វកម្មចំនួន ០២គ្រឿង ។
លោកវរសេនីយ៍ឯក សុខ សារិន អធិការនគរបាលស្រុកបវេល បានរាយការណ៍ឲ្យដឹងថា រថយន្តកងវិស្វកម្មដែលត្រូវបានអគ្គិភ័យឆាបឆេះខាងលើ គឺរថយន្តទី០១ ម៉ាកហ៊ីយ៉ាន់ដាយ ពណ៌ត្រេអ៊ី ពាក់ស្លាកលេខ ខេមរ:ភូមិន្ទ 3.9459 បើកបរដោយឈ្មោះ ប៉ុល ពន្លឺ ភេទប្រុស អាយុ២០ឆ្នាំ មានទីលំនៅភូមិបឹងឈូក ឃុំបឹងឈូក ស្រុកកណ្ដៀង ខេត្តពោធិ៍សាត់ (ខូចខាតផ្នែកខាងមុខទាំងស្រុង) និងរថយន្តទី០២ ម៉ាកហ៊ីយ៉ាន់ដាយ ពណ៌ត្រេអ៊ី ពាក់ស្លាកលេខ ខេមរ:ភូមិន្ទ 3.2016 បើកបរដោយឈ្មោះ យ៉ាន់ សុផល ភេទប្រុស អាយុ ២២ឆ្នាំ មានទីលំនៅភូមិស្រករ ឃុំបឹងខ្នា ស្រុកបាកាន ខេត្តពោធិ៍សាត់ (ខូចខាតផ្នែកខាងក្បាលប្រហែល 90%) ។
តាមការសាកសួរឈ្មោះ ប៉ុល ពន្លឺ បានឲ្យដឹងថា ខ្លួនទើបតែមកបើករថយន្តបានរយ:ពេល១៥ថ្ងៃតែប៉ុណ្ណោះ នៅល្ងាចមុនពេលកើតហេតុខ្លួនបានយករថយន្តទៅឈប់ចត ដាក់ទន្ទឹមគ្នាជាមួយរថយន្តខាងលើ ក្នុងវត្តបឹងក្រឡ ។ ឆ្លងតាមចម្លើយរបស់ឈ្មោះ យ៉ាន់ សុផល បានឲ្យដឹងថា យប់នោះខ្លួននៅដេកក្នុងរថយន្ត ស្រាប់តែម៉ោងប្រហែល០១រំលងអធ្រាត្រ ខ្លួនបានធុំក្លិនឆ្ងៀមខ្សែភ្លើងឆេះចេញរថយន្ត ដែលចតក្បែរនិងរថយន្តរបស់ខ្លួន ពេលនោះក៏បានចុះមកពិនិត្យឈួលពិល ព្រមទាំងបើកទ្វារមើលក្នុងរថយន្តនោះដែរ តែពុំមានភ្លើងឆេះនោះទេ (ការពិនិត្យមិនបានល្អិតល្អន់ប៉ុន្មាននោះទេ) ខ្លួនក៏បានឡើងដេកក្នុងរថយន្តវិញ ។
លុះដល់ម៉ោងប្រហែលប្រហែល០២និង៣០នាទី ស្រាប់តែមានធុំក្លិនឆ្ងៀមខ្លាំងឡើងៗ ខ្លួនបានចុះពីរថយន្តបានឃើញមានហុយផ្សែងចេញពីក្បាលរថយន្តនោះយ៉ាងខ្លាំង ហើយបានរត់មកហៅអ្នកបើករថយន្តជាមួយគ្នា មកជួយពន្លត់ដោយប្រើប្រាស់ទឹកអស់ចំនួន ០២គ្រឿង ។
តាមការសន្និដ្ឋានពីសមត្ថកិច្ចជំនាញ បានឲ្យដឹងថា ការឆេះឆាបនេះគឺបណ្ដាលមកពីការឆ្លងចរន្តភ្លើង ព្រោះរថយន្តនេះចាស់ហើយបានតខ្សែភ្លើងរញ៉េរញ៉ៃ និងមិនបានរាយការណ៍ ជូនសមត្ថកិច្ចមូលដ្ឋានដោយសំអាងថា មានឡានទឹកខ្លួនឯង ។ បច្ចុប្បន្ន រថយន្តឆាបឆេះទាំងពីរគ្រឿងកំពុងរក្សាទុក នៅកន្លែងកើតហេតុរង់ចាំ ចំណាត់ការបន្តតាមនីតិវិធី ៕
មតិយោបល់