ភ្នំពេញៈ នៅវេលាម៉ោង១២និង៤០នាទីយប់រំលងអធា្រត្រឈានចូលថ្ងៃទី១៧ ខែកុម្ភៈ ឆ្នាំ២០២២ មានករណីគ្រោះថ្នាក់ចរាចរណ៍ រថយន្តកាមារីបាឡែន មួយគ្រឿង ពាក់ស្លាកលេខភ្នំពេញ 2AN-4683 បើកបរដោយជនមិនស្គាល់អត្តសញ្ញាណម្នាក់បានរេចង្កូតជ្រុល ទៅបុកទម្លុះចូលផ្ទះពលរដ្ឋ២ល្វែង បណ្តាលឲ្យរងការខូចខាត បង្កការភ្ញាក់ផ្អើលកើតឡើង ដល់ប្រជាពលរដ្ឋនិងកម្លាំងសមត្ថកិច្ចទីតាំង ស្ថិតតាមបណ្តោយផ្លូវ៣០ម៉ែត្រ ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។

ហេតុការណ៍ករណីគ្រោះថ្នាក់ចរាចរណ៍ខាងលើនោះ យោងតាមប្រភពព័ត៌មានភ្នាក់ងារអង្គភាពសារព័ត៌មានPost News យើងខ្ញុំដែល បានចុះទៅដល់ទីតាំងកន្លែងកើតហេតុផ្ទាល់ បានធ្វើសេចក្តីរាយការណ៍ឲ្យដឹងដូច្នេះថា នៅវេលាម៉ោងកើតហេតុមានរថយន្តមួយគ្រឿង ម៉ាកកាមារីបាឡែន ពាក់ស្លាកលេខភ្នំពេញ 2AN-4683 បើកបរដោយបុរសម្នាក់មិនស្គាល់អត្តសញ្ញាណ ។ រថយន្តបង្កហេតុនេះបើក បរធ្វើដំណើរតាមបណ្តោយផ្លូវលេខ៣០ម៉ែត្រ ។ ខណៈកំពុងតែបើកបរនោះ ស្រាប់តែរេចង្កូតជ្រុលល្បឿនទៅបុកទម្លុះចូលផ្ទះ របស់បងប្អូនប្រជាពលរដ្ឋចំនួន០២ល្វែង លាន់ឮសូរផាំងដូចរន្ទះ បង្កឲ្យមានការភ្ញាក់ផ្អើលកើតឡើង ដល់ម្ចាស់ផ្ទះនិងអ្នករស់នៅក្បែរនោះ ។

ករណីគ្រោះថ្នាក់ចរាចរណ៍ខាងលើនេះ យោងតាមការបញ្ជាក់ពីម្ចាស់រថយន្តបង្កហេតុ គាត់បានប្រាប់ក្រុមការងារអង្គភាពសារព័ត៌មាន Post News ឲ្យដឹងដូច្នេះថា ខណៈពេលដែលគាត់កំពុងតែបើកបរសុខៗនោះ គាត់បានបើកគេចរថយន្តមួយគ្រឿងទៀត ក៏បណ្តាលឲ្យរថយន្តរបស់គាត់រេចង្កូតជ្រុលល្បឿនទៅបុកទម្លុះចូលផ្ទះបងប្អូនប្រជាពលរដ្ឋនេះតែម្តង ។

ចំពោះហេតុការណ៍ករណីគ្រោះថ្នាក់ចរាចរណ៍ខាងលើនោះ មិនមានរងគ្រោះថ្នាក់ដល់មនុស្សអ្វីនោះទេ គឺគ្រាន់តែរងការខូចខាតផ្ទះ ចំនួន០២ល្វែងតែប៉ុណ្ណោះ និងរងការខូចខាតរថយន្តបង្កហេតុ ខ្ទេចផ្នែកខាងមុខយ៉ាងដំណំ ។ នៅក្រោយពេលកើតហេតុ វត្តមានកម្លាំងសមត្ថកិច្ច នៅក្នុងមូលដ្ឋានបានចុះទៅពិនិត្យមើលផងដែរ ។ សូមបញ្ជាក់ថា ករណីនេះម្ចាស់រថយន្តបង្កហេតុ បានចេញថ្លៃខូតខាតទាំងប៉ុន្មាននោះ ដើម្បីបញ្ចប់រឿងនៅនឹងកន្លែងកើតហេតុ ៕