កណ្ដាលៈ នៅថ្ងៃសុក្រ ៩រោច ខែមាឃ ឆ្នាំឆ្លូវ ត្រីស័ក ពុទ្ធស័ករាជ ២៥៦៥ ត្រូវនឹងថ្ងៃទី២៥ ខែកុម្ភៈ ឆ្នាំ២០២២ វេលាម៉ោង១២ និង ៥០នាទី ចំណុច មាត់ច្រាំងទន្លេមេគង្គ ភូមិព្រែកតាអុងទី២ ឃុំពាមឧកញ៉ាអុង ស្រុកល្វាឯម ខេត្តកណ្តាល ។ ជនរងគ្រោះឈ្មោះ វាសនា ស្រីនៅ ភេទស្រី អាយុ១៣ ឆ្នាំ ជនជាតិខ្មែរ មុខរបរ សិស្ស ទីលំនៅភូមិព្រែកតាអុងទី១ ឃុំពាមឧកញ៉ាអុង ស្រុកល្វាឯម ខេត្តកណ្ដាល ។

សភាពរឿងហេតុ៖ តាមការបំភ្លឺរបស់ឈ្មោះ ភឹម រស្មី បញ្ជាក់ថា នៅថ្ងៃខែឆ្នាំវេលាម៉ោងកើតហេតុខាងលើ ជនរងគ្រោះឈ្មោះ វាសនា ស្រីនៅ ឈ្មោះ ភឹម រស្មី និង ឈ្មោះ សេង រតនាសោភ័ណ្ឌ បាននាំគ្នាចុះងូតទឹកទន្លេ នៅចំណុចកើតហេតុខាងលើ ដំបូងមានមនុស្សចាស់បីនាក់ងូតទឹកនៅទីនោះដែរ ក្រោយមកពួកគាត់បានឡើងទៅផ្ទះមុន ពេលនោះឈ្មោះ វាសនា ស្រីនៅ និងឈ្មោះ សេង រតនាសោភ័ណ្ឌ ចេញទៅងូតទឹកឆ្ងាយពីមាត់ច្រាំង ហើយឈ្មោះ ភឹម រស្មី បានប្រាប់ថាកំទៅឆ្ងាយៗ ពេកប្រយ័ត្នលង់ទឹក ស្រាប់តែភ្លាមនោះឈ្មោះ វាសនា ស្រីនៅ និងឈ្មោះ សេង រតនាសោភ័ណ្ឌ ក៏លង់ទឹកហើយបានលើកដៃឲ្យជួយឈ្មោះ ភឹម រស្មី ក៏បានបោះឫស្សីអោយ ឈ្មោះ សេង រតនាសោភ័ណ្ឌ តោងហើយទាញមកច្រាំង និងបានបោះធុងកាដុងប្រេងឲ្យ ឈ្មោះ វាសនា ស្រីនៅ តោងតែឈ្មោះ វាសនា ស្រីនៅ ចាប់មិនជាប់ក៏លិចបាត់ចូលទៅក្នុងទឹក បន្ទាប់មក ឈ្មោះ ភឹម រស្មី និងឈ្មោះ សេង រតនាសោភ័ណ្ឌ បាននាំគ្នារត់ទៅប្រាប់ឪពុកម្តាយជនរងគ្រោះ ទើបឪពុកម្តាយជនរងគ្រោះបាននាំគ្នាមករាវរកជនរងគ្រោះ នៅក្នុងទឹករហូតដល់វេលាម៉ោង១៦និង១០នាទី ទើបឃើញជនរងគ្រោះក៏ស្រង់ពីក្នុងទឹកតែជនរងគ្រោះ បានស្លាប់បាត់ទៅហើយ ។

ការពិនិត្យសាកសព មានទឹកចេញតាមច្រមុះនិងមាត់ ពោះមានទឹក ក្រចកដៃពណ៌ស្វាយ មានដីក្នុងក្រចកក្រៅពីនោះ ពុំមានស្លាកស្នាមអ្វីគួរឲ្យកត់សម្គាល់ឡើយ ។

ការសន្និដ្ឋាន ជនរងគ្រោះស្លាប់ដោយសារលង់ទឹក ក្រោយពិនិត្យបានប្រគល់សាកសព ជូនក្រុមគ្រួសារធ្វើបុណ្យតាមប្រពៃណី ៕