ព្រះសីហនុ: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា កម្លាំងជំនាញនៃស្នងការដ្ឋាននគរបាលខេត្តព្រះសីហនុ ធ្វើការស្រាវជ្រាវយ៉ាងយកចិត្តទុកដាក់ និងបានសហការជាមួយកម្លាំងអធិការដ្ឋានស្រុកព្រៃនប់ រហូតដល់វេលាម៉ោង០១និង០០នាទីរំលងអធ្រាត្រ ឈានចូលថ្ងៃទី០៨ ខែមេសា ឆ្នាំ២០២២ បានឃាត់រថយន្ត១គ្រឿង នៅចំណុចភូមិអូរចំណារ ឃុំអូរឧកញ៉ាហេង ស្រុកព្រៃនប់ និងឃាត់ខ្លួនយុវជនម្នាក់ជនជាតិខ្មែរ មកស្នងការដ្ឋាននគរបាលខេត្តព្រះសីហនុ ដើម្បីសួរនាំ ។
សមត្ថកិច្ចបានឲ្យដឹងថា នៅថ្ងៃទី០៧ ខែមេសា ឆ្នាំ២០២២ វេលាម៉ោង២៣និង៥០នាទី មានប្រជាពលរដ្ឋរាយការណ៍ តាមរយ:ទូរស័ព្ទហតឡាញរបស់ស្នងការដ្ឋាននគរបាលខេត្តព្រះសីហនុថា ខ្លួនបានបាត់រថយន្ត ១គ្រឿង ម៉ាក PRIUS ពណ៌ទឹកមាស ពាក់ស្លាកលេខ ភ្នំពេញ 2AE-2218 ដែលបានចតទុកនៅមុខផ្ទះ នៅចំណុច ភូមិ២ សង្កាត់៣ ក្រុង-ខេត្តព្រះសីហនុ ។ បន្ទាប់ពីទទួលបានព័ត៌មានខាងលើ សមត្ថកិច្ចបានសហការស្រាវជ្រាវ ឈានទៅដល់ឃាត់ខ្លួនជនសង្ស័យ និងរថយន្តខាងលើបានផងដែរ ។
ម្ចាស់រថយន្តមានឈ្មោះ ឆេង គីមឡេង ភេទស្រី អាយុ ២៩ ឆ្នាំ ជនជាតិខ្មែរ មុខរបរ លក់ដូរ មានទីលំនៅ ភូមិ៣ សង្កាត់៣ ក្រុង-ខេត្តព្រះសីហនុ ។ សម្ភារ:បាត់បង់៖ -រថយន្ត ១គ្រឿង ម៉ាក PRIUS ពណ៌ទឹកមាស ពាក់ស្លាកលេខ ភ្នំពេញ 2AE-2218 ។
ជនសង្ស័យឈ្មោះ ស្រ៊ុន សុភី ភេទប្រុស អាយុ ១៦ ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅ ភូមិ២ សង្កាត់៣ ក្រុង-ខេត្តព្រះសីហនុ ។ +សម្ភារ:វត្ថុតាងចាប់យកបាន៖ -រថយន្ត ១គ្រឿង ម៉ាក PRIUS ពណ៌ទឹកមាស ពាក់ស្លាកលេខ ភ្នំពេញ 2AE-2218 ។ -ម៉ូតូ ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខតាកែវ 1Q-6539 ។
ករណីខាងលើនេះ ការិយាល័យនគរបាលព្រហ្មទណ្ឌកម្រិតស្រាលកំពុងសួរនាំ ដើម្បីកសាងសំណុំរឿងអនុវត្តបន្តតាមនីតិវិធី ។
សមត្ថកិច្ចបានឲ្យដឹងទៀតថា ជនសង្ស័យធ្លាប់ធ្វើសកម្មភាពលួចម៉ូតូ ចំនួន០៣ដង រួចមកហើយ ដោយលើកចុងក្រោយនៅថ្ងៃទី០៦ ខែមេសា ឆ្នាំ២០២២ វេលាម៉ោង០០ និង១០នាទីរំលងអធ្រាត្រ ជនសង្ស័យបានធ្វើសកម្មភាពលួចម៉ូតូ ១គ្រឿង ម៉ាក ហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខតាកែវ 1Q-6539 នៅចំណុច ក្រោយសាលាហ៊ុនសែនឃ្លាំងលើ ស្ថិតក្នុង ភូមិ១ សង្កាត់១ ក្រុង-ខេត្តព្រះសីហនុ ។
បន្ទាប់មក នៅថ្ងៃទី០៧ ខែមេសា ឆ្នាំ២០២២ វេលាម៉ោង២៣និង៣០នាទីយប់ ជនសង្ស័យបានជិះម៉ូតូដែលលួចបានខាងលើ ទៅចំណុចម្តុំផ្លូវសេតេ ស្ថិតក្នុង ភូមិ២ សង្កាត់៣ ក្រុង-ខេត្តព្រះសីហនុ រួចធ្វើសកម្មភាពលួចរថយន្ត ១គ្រឿង ម៉ាក PRIUS ពណ៌ទឹកមាស ពាក់ស្លាកលេខ ភ្នំពេញ 2AE-2218 ដែលចតទុកនៅមុខហាងលក់អីវ៉ាន់មួយកន្លែង រួចជិះរថយន្តនោះរត់គេចខ្លួន ដោយបន្សល់ទុកម៉ុតូនៅកន្លែងកើតហេតុ លុះជិះរថយន្តដល់ចំណុច ភូមិអូរចំណារ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ក៏ត្រូវសមត្ថកិច្ចឃាត់រថយន្តបានតែម្តង ៕
មតិយោបល់