ភ្នំពេញៈ នាវេលាម៉ោង ៩និង៣០នាទីយប់ថ្ងៃទី២៤ ខែមេសា ឆ្នាំ២០២២ មានករណីតៃកុងងងុយដេកងោកមួយភាំង បើករថយន្តដឹកផ្លែឈើ រេចង្កូតជ្រុលបុករបាំងថ្មពុះចែកទ្រូងផ្លូវ បណ្ដាលឲ្យក្រឡាប់ផ្ងារជើង​ ស្ថិតតាមបណ្ដោយផ្លូវលេខ៥៩៨ សង្កាត់ទួលង្កែទី២ ខណ្ឌឫស្សីកែវ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់ បើកបររថយន្តដឹកផ្លែឈើមួយគ្រឿងម៉ាក KIA ពណ៌ស ពាក់ស្លាកលេខ ភ្នំពេញ 3D-7570 ដែលបើកធ្វើដំណើរតាមបណ្ដោយផ្លូវ៥៩៨ ពីជើងទៅត្បូង និងក្នុងល្បឿនលឿន លុះដល់ចំណុចកើតហេតុដោយតៃកុងរថយន្តងងុយដេករួច ក៏បានងោកមួយភាំងធ្វើឲ្យរថយន្តរេចង្កូតទៅខាងឆ្វេង ជ្រុលទៅបុករបាំងថ្មពុះចែកទ្រូងផ្លូវពេញទំហឹង បណ្តាលឲ្យបាក់ខូចខាតអស់ពីរកង់ ចំណែកឯរថយន្តបានក្រឡាប់ផ្ងារជើងចាក់ផ្លែឈើចោលពេញផ្លូវរងការខូចខាតយ៉ាងដំណំ តែមិនបណ្ដាលឲ្យមាននរណាម្នាក់រងរបួសនោះទេ បន្ទាប់មកក៏មានសមត្ថកិច្ចមូលដ្ឋាន បានចុះធ្វើការអន្តរាគមន៍ភ្លាមៗតែម្ដង។

ក្រោយពេលកើតហេតុសមត្ថកិច្ចជំនាញ ក៏បានចុះធ្វើការវាស់វែងស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននរគបាលរាជធានីភ្នំពេញ ដើម្បីរង់ចាំដោះស្រាយទៅតាមផ្លូវច្បាប់នៅពេលក្រោយជាបន្តទៀត៕