សៀមរាប: កាលពីវេលាម៉ោង០៩និង០០នាទី ថ្ងៃទី១៧ ខែឧសភា ឆ្នាំ២០២២ កម្លាំងនគរបាលស្រុកប្រាសាទបាគង បានធ្វើឃាត់ខ្លួនជនសង្ស័យម្នាក់ឈ្មោះ រិន ចម្រើន ភេទប្រុស ឆ្នាំកំណើត (០១.០៩.១៩៨៧) មានស្រុកកំណើត នៅភូមិ អន្សារក្រង ឃុំអន្សារក្រង ស្រុកស្ទោង ខេត្តកំពង់ធំ បច្ចុប្បន្ន ស្នាក់នៅផ្ទះជួល ក្នុងភូមិអញ្ចាញថ្មី សង្កាត់នគរធំ ក្រុងសៀមរាប ពាក់ព័ន្ធករណីអំពើឆបោក យកដីខ្សាច់ច្រកក្នុងការ៉ុងបន្លំជាស្ករស ដើរលក់ឲ្យពលរដ្ឋ និងអជីវករ នៅភូមិជ្រៃ ឃុំកណ្ដែក ស្រុកប្រាសាទបាគង ខេត្តសៀមរាប ។

បន្ទាប់ពីឃាត់ខ្លួន ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាព យកដីខ្សាច់ច្រកក្នុងការ៉ុងស្ករសហើយ យកមកលក់ឲ្យជនរងគ្រោះ បានចំនួន៩ការ៉ុង ដោយក្នុងមួយការ៉ុងតម្លៃ១០ម៉ឺនរៀលពិតប្រាកដមែន និងបានធ្វើសកម្មភាព យកដីខ្សាច់ច្រកការ៉ុង លក់ឲ្យអ្នករស់នៅម្តុំផ្សារត្រាំនាគ ពុំស្គាល់ឈ្មោះ ០១លើក និង លក់ឲ្យអ្នករស់នៅម្តុំវត្តល្អក់ ពុំស្គាល់ឈ្មោះ០១លើក ផងដែរ ចំណែកលុយដែលលក់បានខ្លួនយកទៅចាយវាយអស់ ។

ធ្វើតេស្តទឹកនោម រកសារធាតុញៀន ជា លទ្ធផល វិជ្ជមាន ។

យោងតាមពាក្យបណ្តឹងរបស់ជនរងគ្រោះ ចម្លើយសារភាព និងវត្ថុងតាង ជនសង្ស័យត្រូវបានកម្លាំងព្រហ្មទណ្ឌស្រុក សហការជាមួយកម្លាំងការិយាល័យព្រហ្មទណ្ឌ កសាងសំណុំរឿង បញ្ជូនទៅសាលាដំបូងខេត្តសៀមរាប ដើម្បីចាត់ការតាមនីតិវិធីច្បាប់ ៕