ភ្នំពេញៈ នៅវេលាម៉ោង១២និង៣០នាទីយប់រំលងអធ្រាត្រឈានចូលថ្ងៃទី១០ ខែមិថុនា ឆ្នាំ២០២២ មានករណីគ្រោះថ្នាក់ចរាចរណ៍ មានរថយន្តកុងតឺន័រមួយគ្រឿង ពាក់ស្លាកលេខភ្នំពេញ 3C-5193 និងរថយន្តមួយគ្រឿងទៀត ពាក់ស្លាកលេខកម្ពុជា NOV-RINA បានបុកគ្នាពេញទំហឹង បណ្តាលឲ្យមនុស្សរងរបួស និងខូចខាតទាំងសងខាង ស្ថិតតាមបណ្តោយផ្លូវជាតិលេខ១ ក្នុងសង្កាត់ព្រែកឯង ខណ្ឌច្បារអំពៅ រាជធានីភ្នំពេញ ។

ហេតុការណ៍ករណីគ្រោះថ្នាក់ចរាចរណ៍ខាងលើនេះ នៅមុនពេលកើតហេតុ គេឃើញរថយន្តទាំងពីរគ្រឿង បើកបរធ្វើដំណើរតាម បណ្តោយផ្លូវជាតិលេខ១ មិនដឹងទិសដៅចេញពីកន្លែងណាទៅណានោះទេ ។ លុះពេលធ្វើដំណើរមកដល់ត្រង់ចំណុចកើតហេតុ រថយន្តទាំងពីរគ្រឿងនេះ បានបុកគ្នាយ៉ាងពេញទំហឹងតែម្តង បណ្តាលឲ្យម​នុស្សរងរបួស ។ ក្នុងហេតុការណ៍នេះ មិនទាន់ដឹងច្បាស់ថា មនុស្សរងរបួសប៉ុន្មាននាក់នោះទេ ។ ព្រោះជនរងគ្រោះ ត្រូវបានរថយន្តពេទ្យដឹកយកទៅសង្រ្គោះបន្ទាន់ មុនពេលក្រុមការងារ នៃអង្គភាពសារព័ត៌មាន Post News យើងខ្ញុំបានចុះទៅដល់ ។

បន្ទាប់ពីកើតហេតុ វត្តមានកម្លាំងសមត្ថកិច្ចជំនាញ នៅក្នុងមូលដ្ឋានបានចុះទៅដល់ទីតាំងកន្លែងកើតហេតុ ដើម្បីអន្តរាគមន៍ ។ ចំពោះករណីគ្រោះថ្នាក់ចរាចរណ៍នេះ មិនទាន់ដឹងថា កម្លាំងសមត្ថកិច្ចជំនាញមានចំណាត់ការយ៉ាងណានោះទេ ។

ទិដ្ឋភាពនៅកន្លែងកើតហេតុនោះវិញ យើងសង្កេតឃើញថា រថយន្តកុងតឺន័របានរងការខូចខាតផ្នែកខាងមុខយ៉ាងដំណំផងដែរ ។ ចំណែកឯភាគីរថយន្តមួយគ្រឿងទៀតនោះ ក៏រងការខូចខាតយ៉ាងធ្ងន់ធ្ងរខ្លាំងណាស់ដែរ នូវផ្នែកខាងមុខឡើងខ្ទេចតែម្តង ។

សូមបញ្ជាក់ថា ករណីគ្រោះថ្នាក់ចរាចរណ៍ខាងលើនេះ មិនទាន់ដឹងច្បាស់ថា បណ្តាលមកពីមូលហេតុអ្វីឲ្យពិតប្រាកដនូវឡើយ ព្រោះមិនទាន់មានប្រភពបញ្ជាក់ប្រាប់ ។ ប៉ុន្តែក្នុងហេតុការណ៍នេះ បណ្តាលឲ្យមនុស្សរងរបួស ត្រូវបានដឹកបញ្ជូនទៅកាន់មន្ទីរពេទ្យ ដើម្បីជួយសង្រ្គោះបន្ទាន់ផងដែរ ប៉ុន្តែមិនដឹងប៉ុន្មាននាក់នោះទេ ៕