ព្រះសីហនុ: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា ដោយអនុវត្តតាមបទបញ្ជា និងការណែនាំចង្អុលបង្ហាញពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ កម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តព្រះសីហនុ បានធ្វើការស្រាវជ្រាវយ៉ាងយកចិត្តទុកដាក់ និងបានរៀបចំផែនការបង្ក្រាបយ៉ាងល្អិតល្អន់ ដើម្បីចាប់ឃាត់ខ្លួនមុខសញ្ញាធ្វើសកម្មភាពឆក់ទូរស័ព្ទ និងកាបូបរបស់ប្រជាពលរដ្ឋ មួយក្រុមធំដែលមកពីរាជធានីភ្នំពេញ ។
សមត្ថកិច្ចបានឲ្យដឹងថា នៅថ្ងៃទី ០៦ ខែកក្កដា ឆ្នាំ២០២២ ការិយាល័យព្រហ្មទណ្ឌបានធ្វើការឃាត់ខ្លួនមុខសញ្ញាសង្ស័យចំនួន ០៧នាក់ ជាបន្តបន្ទាប់ ពាក់ព័ន្ធនឹងករណី អំពើលួចមានស្ថានទម្ងន់ទោស (ឆក់) ដោយកម្លាំងល្បាតបានតាមពីក្រោយក្រុមជនសង្ស័យ រហូតពួកគេធ្វើសកម្មភាពឆកការបូបពីស្ត្រីម្នាក់ ដែលបំរុងដើរឆ្លងនៅម្ដុំផ្លូវកែងរ៉ា កម្លាំងឃើញដូចនេះបានធ្វើការបង្ក្រាប និងស្រាវជ្រាវតាមចាប់បានជាបន្តបន្ទាប់ និងដកហូតបានសម្ភារវត្ថុតាងមួយចំនួន ។
ជនសង្ស័យចំនួន០៧នាក់ មានឈ្មោះដូចខាងក្រោម ៖ ១-ឈ្មោះ ផល លុច ហៅ ចាស់ ភេទប្រុស អាយុ ១៥ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅ រាជធានភ្នំពេញ ។ ២-ឈ្មោះ ណែម ផានិត ហៅ ខ្និត ភេទប្រុស អាយុ ២០ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅ រាជធានភ្នំពេញ ។ ៣-ឈ្មោះ ឈៀង សីហា ភេទប្រុស អាយុ ១៧ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅ ភូមិតំណាក់ធំ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។ ៤-ឈ្មោះ ឃុត សុជាតិ ហៅ ញ៉ា ភេទប្រុស អាយុ ១៨ឆ្នាំ ជនជាតិខ្មែរ មុខរបរ ដឹកម្ហូប ស្នាក់នៅ ភូមិ៤ សង្កាត់៤ ក្រុង-ខេត្តព្រះសីហនុ ។ ៥-ឈ្មោះ ឆាន់ ណាទ្រីវ ហៅ ហេង ភេទប្រុស អាយុ ១៨ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅ ភូមិ៤ សង្កាត់៤ ក្រុង-ខេត្តព្រះសីហនុ ។ ៦-ឈ្មោះ នាង សុផា ហៅ ឡេវ ភេទប្រុស អាយុ ១៧ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅ ខណ្ឌស្ទឹងមានជ័យ រាជធានីភ្នំពេញ ។ ៧-ឈ្មោះ ហ៊ួ គឹមសេង ហៅ ពូជ ភេទប្រុស អាយុ ១៧ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅ សង្កាត់៣ ក្រុង-ខេត្តព្រះសីហនុ ។
សម្ភារ:វត្ថុតាងចាប់ដកហូតជាមួយនឹងការឃាត់ខ្លួនជនសង្ស័យ មាន -ម៉ូតូចំនួន ០៥គ្រឿង៖ (មធ្យោបាយធ្វើសកម្មភាព) ១-ម៉ាក និច ពណ៌ប្រាក់ ពាក់ស្លាកលេខ ភ្នំពេញ 1GW-8416 ។ ២-ម៉ាកនិច ពណ៌ស ពាក់ស្លាកលេខ ភ្នំពេញ 1GV-3455 (ប្រើស្លាកលេខក្លែងបន្លំ សម្រាប់ធ្វើសកម្មភាពឆក់) ។ ៣-ម៉ាក ស្គូពី ពណ៌ខ្មៅ ពាក់ស្លាកលេខ ភ្នំពេញ កណ្តាល 1AJ-1655 ។ ៤-ម៉ាក ហុងដា សេ១២៥ ពណ៌ខ្មៅ ពាក់ស្លាកលេខ កំពត 1R-0372 ។ ៥-ម៉ាក ហុងដា សេ១២៥ ពណ៌ខ្មៅ គ្មានស្លាកលេខ ។ -ស្លាកលេខម៉ូតូ ១ផ្ទាំង លេខ ភ្នំពេញ 1IU-9928 ។ (ផ្លាស់ប្តូរពេលធ្វើសកម្មភាពឆក់) -ទូរស័ព្ទចំនួន ០៦គ្រឿង ។ -កាបូបលុយ ចំនួន ០៥ ។
ករណីខាងលើនេះ កម្លាំងការិយាល័យនគរបាលព្រហ្មទណ្ឌកម្រិតស្រាល បានកសាងសំណុំរឿងដើម្បីអនុវត្តបន្តតាមនីតិវិធី ៕
មតិយោបល់