ភ្នំពេញៈ យោងតាមផេកអគ្គស្នងការដ្ឋាននគរបាលជាតិបានឲ្យដឹងថា ជនសង្ស័យចំនួន ២នាក់ ត្រូវបានកម្លាំងនគរបាលព្រហ្មទណ្ឌ សហការជាមួយកម្លាំងអធិការដ្ឋាននគរបាលខណ្ឌពាក់ព័ន្ធ ស្រាវជ្រាវបង្ក្រាបចាប់ខ្លួនជាបន្តបន្ទាប់ ក្នុងករណីឆក់កាបូប និងទូរស័ព្ទចំនួន ២ករណីផ្សេងគ្នា ក្នុងខណ្ឌមានជ័យ និងខណ្ឌសែនសុខ រាជធានីភ្នំពេញ កាលពីកន្លងទៅ ។
លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ប្រាប់ឱ្យដឹងថា៖ នៅថ្ងៃទី០៨ ខែកក្កដា ឆ្នាំ២០២២ វេលាម៉ោង៥និង៣០នាទីល្ងាច កម្លាំងការិយាល័យជំនាញសហការជាមួយកម្លាំងមូលដ្ឋាន បានស្រាវជ្រាវក្នុងបទល្មើសជាក់ស្តែងឃាត់ខ្លួនបានជនសង្ស័យចំនួន០១នាក់ ឈ្មោះ សៀក លីសៀ ហៅ ង៉ោលភេទ ប្រុស អាយុ ១៨ឆ្នាំ ជនជាតិ ខ្មែរ មុខរបរ ដឹកអីវ៉ាន់អនឡាញ រស់នៅខណ្ឌសែនសុខ នៅចំណុចស្ថានីយ៍ប្រេងឥន្ធនៈ PTT ផ្លូវលេខ២០០៤ សង្កាត់អូរបែកក្អម ខណ្ឌសែនសុខ ពាក់ព័ន្ធប្រព្រឹត្តអំពើហិង្សា (ឆក់កាបូបស្ពាយពីក្រោយមិនបានសម្រេច) ប្រព្រឹត្តនៅចំណុចលើផ្លូវសឡា(៣៧១) ភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ កាលពីថ្ងៃទី០៨ ខែកក្កដា ឆ្នាំ២០២២ វេលាម៉ោង៣រសៀល ។ខណៈដែលជនរងគ្រោះឈ្មោះ សែត សុដាវីន ភេទស្រី អាយុ ២៨ឆ្នាំ ជនជាតិខ្មែរ មុខរបរនិស្សិត កំពុងជិះម៉ូតូម៉ាកហុងដាធូដេ ម្នាក់ឯងដោយមានដាក់កាបូបស្ពាយខាងក្រោយ នៅលើទូកម៉ូតូខាងមុខ ពេលឃើញដូច្នេះ ជនសង្ស័យ និងបក្ខពួកជិះម៉ូតូចំនួន០២គ្រឿងមានគ្នា០៤នាក់ បានធ្វើសកម្មភាពឆក់ និងមានបក្ខពួក០២នាក់ជិះម៉ូតូ០១គ្រឿងចាំបិទគូថខាងក្រោយ។
លោកនាយការិយាល័យបានប្រាប់ឱ្យដឹងទៀតថា៖ ក្រោយពីជនសង្ស័យបានប្រព្រឹត្តអំពើឆក់កាបូបរួច ហើយពួកវាបានជិះម៉ូតូគេចខ្លួនដល់ផ្លូវលេខ២០០៤ សង្កាត់អូរបែកក្អម ខណ្ឌសែនសុខ ក៏ជួបសមត្ថកិច្ចកំពុងល្បាតការពារសុវត្ថិភាពនៅទីនោះ ក៏បានបើកម៉ូតូដេញតាមពីក្រោយ ។ ឃើញដូច្នេះជនសង្ស័យ ក៏បានបោះកាបូបស្ពាយខាងក្រោយរបស់ជនរងគ្រោះចោលនៅលើថ្នល់ ហើយជនសង្ស័យក៏នាំគ្នាជិះម៉ូតូគេចខ្លួនបាត់អស់ ។ ក្រោយមកទៀតកម្លាំងសមត្ថកិច្ចបានស្រាវជ្រាវចាប់ឃាត់ខ្លួនជនសង្ស័យ០១នាក់ក្នុងចំណោមបក្ខពួក០៤នាក់ ។ ចំណែកទ្រព្យសម្បត្តិជនរងគ្រោះ សមត្ថកិច្ចបានប្រគល់ឱ្យម្ចាស់ ។
លោកវរសេនីយ៍ឯក ប៊ុន សត្យា ឱ្យដឹងទៀតថា នៅថ្ងៃទី០៩ ខែកក្កដា ឆ្នាំ២០២២ វេលាម៉ោង១២ថ្ងៃត្រង់ កម្លាំងការិយាល័យព្រហ្មទណ្ឌបានស្រាវជ្រាវឃាត់ខ្លួនជនសង្ស័យម្នាក់ក្នុងចំណោមបក្ខពួក៥នាក់ ឈ្មោះ ហឿង មីនា ហៅ ពេជ្រ ភេទប្រុស អាយុ១៨ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅសង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។ ជនសង្ស័យត្រូវបានឃាត់ខ្លួននៅចំណុចមុខវត្តសំបួរ ផ្លូវលេខ២១៧ សង្កាត់ដង្កោ ខណ្ឌដង្កោ បន្ទាប់ពីធ្វើសកម្មភាពប្រព្រឹត្តអំពើហិង្សា (ឆក់ទូរសព្ទ័ដៃម៉ាកអុបប៉ូ)របស់ជនរងគ្រោះ នៅចំណុចទល់មុខមជ្ឃមណ្ឌលថែទាំរថយន្តអែនឃែរ ផ្ទះលេខ២៦៧ ផ្លូវលេខ២០០២ ភូមិត្រពាំងឈូក សង្កាត់អូរបែកក្អម ខណ្ឌសែនសុខ រាជធានីភ្នំពេញ កាលពីថ្ងៃទី១៥ ខែមិថុនា ឆ្នាំ២០២២ វេលាម៉ោង១៥និង២០នាទី ។
នគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ នៅរសៀលថ្ងៃទី១២ ខែកក្កដា ឆ្នាំ២០២២ បានបញ្ជូនជនសង្ស័យទៅសាលាដំបូងរាជធានីភ្នំពេញចាត់ការតាមផ្លូវច្បាប់ ៕
មតិយោបល់