បាត់ដំបង: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា នៅថ្ងៃទី៣០ ខែសីហា ឆ្នាំ២០២២ វេលាម៉ោង ១៩និង២០នាទី មានករណីគ្រោះថ្នាក់ចរាចរណ៍ មួយកើតឡើង ត្រង់ចំណុចផ្លូវជាតិលេខ៥៩ ស្ថិតក្នុងក្រុមទី១០ ភូមិពោធិ៍ជ្រៃ ឃុំសិរីមានជ័យ ស្រុកសំពៅលូន រវាងម៉ូតូ០១គ្រឿង និងម៉ូតូកង់បី បណ្តាលឲ្យមនុស្សម្នាក់ស្លាប់ និងម្នាក់ទៀតរងរបួសធ្ងន់ ។
លោកវរសេនីយ៍ទោ ទឹម វិឆ័យ អធិការនគរបាលស្រុកសំពៅលូន បានរាយការណ៍ឲ្យដឹងថា គ្រោះថ្នាក់ចរាចរណ៍នេះបង្កឡើងដោយម៉ូតូម៉ាក Scoopy ពណ៌ស (គ្មានស្លាកលេខ) បើកបរដោយឈ្មោះ រឿន គីម ភេទស្រី អាយុ១៧ឆ្នាំ រស់នៅភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង (របួសធ្ងន់) និងអ្នករួមដំណើរចំនួន០១នាក់ទៀតឈ្មោះ ប្រាក់ សីហា ភេទប្រុស អាយុ២៩ឆ្នាំ រស់នៅភូមិរស្មី ឃុំជ្រៃសីមា ស្រុកសំពៅលូន ខេត្តបាត់ដំបង (របួសធ្ងន់) បើកបរដោយមិនពាក់មួកសុវត្តិភាព ។ ដល់ចំណុចកើតហេតុខាងលើបានបុកជាមួយម៉ូតូកង់បី០១គ្រឿង ម៉ាក Wave ពណ៌ក្រហម (គ្មានស្លាក់លេខ) អ្នកបើកបរដោយឈ្មោះ សាវ ពយ ភេទប្រុស អាយុ៣៥ឆ្នាំ រស់នៅភូមិពោធិ៍ជ្រៃ ឃុំសិរីមានជ័យ ស្រុកសំពៅលូន ខេត្តបាត់ដំបង (រត់គេចខ្លួន) និងអ្នករួមដំណើរឈ្មោះ គក់ ភេទប្រុស អាយុ៤០ឆ្នាំ រស់នៅភូមិពោធិ៍ជ្រៃ ឃុំសិរីមានជ័យ ស្រុកសំពៅលូន ខេត្តបាត់ដំបង (ស្លាប់ក្រោយពេលបញ្ជូនទៅមន្ទីពេទ្យ)។
តាមការពិនិត្យរបស់នគរបាលនៅកន្លែងកើតហេតុ អ្នកបើកបរម៉ូតូកង់បីមានគ្នា០២នាក់ បានបើកឆ្លងផ្លូវក្នុងទិសដៅពីកើតទៅលិច ខណ:កំពុងឆ្លងនោះក៏មានម៉ូតូម៉ាក Scoopy ធ្វើដំណើរដោយមានគ្នា០២នាក់ ក្នុងទិសដៅពីជើងទៅត្បូង ក៏បានបុកគ្នាជាមួយកង់បីពេញមួយទំហឹងតែម្ដង ។
ករណីនេះ ចំពោះមធ្យោបាយបង្កទាំងពីរគ្រឿង សមត្ថកិច្ចបាននាំយកទៅរក្សាទុក នៅអធិការដ្ឋាននគរបាលស្រុកសំពៅលូន រង់ចាំដំណោះស្រាយតាមនីតិវិធី ។ ចំពោះសាកសពជនរងគ្រោះត្រូវបានប្រគល់ជូនទៅឲ្យក្រុមគ្រួសារ ដើម្បីយកទៅធ្វើបុណ្យតាមប្រពៃណី ៕
មតិយោបល់